మెగా సంబ‌రం డిసెంబ‌రు 25న‌

మెగాస్టార్ అభిమానులు ఉప్పొంగిపోయేలా చేసే స‌మాచారం వ‌చ్చేసింది. చిరంజీవి రీఎంట్రీ మూవీ ‘ఖైదీ నెంబ‌ర్ 150’ ఆడియో వేడుక ఉంటుందా ఉండ‌దా.. ఉంటే అస‌లెప్పుడు ఉంటుంది.. ఎక్క‌డ ఉంటుంది అన్న ప్ర‌శ్న‌ల‌కు స‌మాధానం దొరికేసింది. ఈ నెల 25న ‘ఖైదీ నెంబ‌ర్ 150’ ఆడియో వేడుక‌కు ముహూర్తం నిర్ణ‌యించారు. విజ‌య‌వాడ‌లోని ఇందిరాగాంధీ స్టేడియంలో ఈ వేడుక జ‌ర‌గ‌నుంది. గత కొన్ని రోజులుగా ప్ర‌చారం జ‌రుగుతున్న‌ట్లు ఆడియో వేడుక‌ను ర‌ద్దు చేసి అల్లు అర‌వింద్ స్ట‌యిల్లో ప్రి రిలీజ్ ఫంక్ష‌న్ చేయాల‌న్న ఆలోచ‌న‌ను మార్చుకుంది రామ్ చ‌ర‌ణ్ అండ్ కో. ముందు అనుకున్న‌ట్లే ఆడియో వేడు చేయాలని నిర్ణ‌యించారు.

ముందు ఆడియో వేడుక విజ‌య‌వాడ‌లో చేసి.. ఆ త‌ర్వాత హైద‌రాబాద్ లో ఒక ఫంక్ష‌న్ ఏదైనా చేయాల‌ని భావిస్తున్న‌ట్లు స‌మాచారం. ‘ఖైదీ నెంబ‌ర్ 150’ షూటింగ్ ప్ర‌స్తుతం చివ‌రి ద‌శ‌లో ఉంది. పోస్ట్ ప్రొడ‌క్ష‌న్ కార్య‌క్ర‌మాలు కూడా మొద‌లైపోతున్నాయి. ఈ ప‌ని ఓ కొలిక్కి వ‌చ్చే ద‌శ‌లో ప్ర‌శాంతంగా ఆడియో వేడుక చేయాల‌ని నిర్ణ‌యించారు. ఈ గురువార‌మే ‘ఖైదీ నెంబ‌ర్ 150’ టీజ‌ర్ రిలీజ‌వుతున్న సంగ‌తి తెలిసిందే. ధృవ థియేట‌ర్ల‌లోనూ టీజ‌ర్ని ప్ర‌ద‌ర్శించ‌నున్నారు. రెండు వారాల పాటు అభిమానులు ఈ టీజ‌ర్ తో కాల‌క్షేపం చేయొచ్చు. ఆలోపు ట్రైల‌ర్.. ఆడియో ఒకేసారి అభిమానుల్ని ముంచెత్త‌డానికి వ‌చ్చేస్తాయి. త‌ర్వాత రెండు వారాల‌కు సినిమా రెడీ అయిపోతుంది.


Like Us on Facebook : https://www.facebook.com/Tupakidotcom/