త్రో బ్యాక్: మెగాస్టార్ పార్టీలో మహేష్ - ప్రభాస్...!

టాలీవుడ్ హీరోలందరూ అందరూ ఒకచోట కలవడం మనం చాలా అరుదుగా చూస్తుంటాం. సినీ ఉత్సవాల సమయంలోనో.. సినీ ఇండస్ట్రీకి సంబంధించిన ఏవైనా వేడుకలు జరిగితేనో.. ఇండస్ట్రీలో ఏదైనా భారీ ఈవెంట్ జరిగితేనో.. శుభకార్యాలలోనో తప్ప అలాంటి దృశ్యం ఎక్కువగా కనిపించదు. ఇక స్టార్ హీరోల సంగతి చెప్పక్కర్లేదు. వాళ్ళందరూ కలిసి దిగిన ఫోటోలు గూగుల్ చేస్తే అక్కడక్కడ కొన్ని దొరుకుతాయి. అయితే ఈ మధ్య ఒకరిద్దరు స్టార్ హీరోలు వేరే హీరోని సినిమా ఈవెంట్స్ కి పిలిచే ట్రెండ్ కి శ్రీకారం చుట్టారు. ఇప్పుడు అంటే స్టార్ హీరోలు ఒక ఫొటోలో కనిపిస్తే అభిమానులు ఖుషీ అవుతున్నారు కానీ.. ఒకప్పుడు హీరోలందరూ రెగ్యులర్ గా కలిసేవారు. ఇప్పుడు మెగాస్టార్ చిరంజీవితో సూపర్ స్టార్ మహేష్ బాబు - యంగ్ రెబల్ స్టార్ ప్రభాస్ కలిసి ఉన్న ఓ త్రో బ్యాక్ పిక్ నెట్టింట హల్ చల్ చేస్తోంది.

మెగాస్టార్ చిరంజీవి హిట్ సినిమాల్లో ''శంకర్ దాదా ఎంబీబీఎస్'' ఒకటి. జయంత్ సి. పరాన్జీ దర్శకత్వంలో తెరకెక్కిన ఈ సినిమా విడుదలై నేటికి 16 ఏళ్లు అయింది. సోనాలి బింద్రే హీరోయిన్ గా.. శ్రీకాంత్ - గిరీష్ కర్నాడ్ ముఖ్య పాత్రల్లో నటించిన ఈ సినిమా మంచి విజయం అందుకుంది. దీంతో ఈ చిత్ర యూనిట్ సక్సెస్ పార్టీ ఏర్పాటు చేశారు. ఈ పార్టీకి సంబంధించిన ఫోటో ఒకటి బయటకు వచ్చింది. ఈ ఫొటోలో చిరంజీవి - మహేష్ - ప్రభాస్ - తరుణ్ - శ్రీకాంత్ - సుమంత్ కనిపిస్తున్నారు. వీరితో పాటు 'శంకర్ దాదా ఎంబీబీఎస్' మ్యూజిక్ డైరెక్టర్ దేవిశ్రీ ప్రసాద్ - డైరెక్టర్ జయంత్ సి. పరాన్జీ కూడా ఉన్నారు. ఈ హీరోలలో సుమంత్ తప్ప మిగతా అందరూ జయంత్ సినిమాల్లో నటించినవారే. ఈ ఫొటోలో మహేష్ - ప్రభాస్ అప్పటి ట్రెండ్ కు తగ్గట్టు డ్రెస్సింగ్ లో కనిపిస్తున్నారు. ఏదేమైనా స్టార్ హీరోలు ఒక సినిమాలో నటిస్తేనే కాదు.. ఒక ఫోటోలో కనిపించినా సినీ అభిమానులకు పండగే!