ఆ కుర్చీలో మెగాస్టార్.. డేట్ వచ్చేసింది బాస్

మెగాస్టార్ చిరంజీవిని సరికొత్త అవతారంలో చూసేందుకు ముహూర్తం కుదిరింది. మాటీవీలో సూపర్ పాపులరైన క్విజ్ షో ‘మీలో ఎవరు కోటీశ్వరుడు’లో చిరును చూసేందుకు ఇంకా ఎన్నో రోజులు ఎదురు చూడాల్సిన పని లేదు. ఈ నెల 13నే చిరు హోస్ట్ గా మీలో ఎవరు కోటీశ్వరుడు నాలుగో సీజన్ తొలి ఎపిసోడ్ ప్రసారం కాబోతోంది. మూడు సీజన్ల పాటు నాగార్జున అద్భుతంగా ఈ షోను నడిపించగా.. నాలుగో సీజన్ ముంగిట ఆయన ఆ బాధ్యతల నుంచి తప్పుకోవడం.. మెగాస్టార్ చిరంజీవి హోస్ట్ పాత్రలోకి రావడం తెలిసిందే. నాగ్ ఈ షో నుంచి తప్పుకున్నాడన్న వార్త నిరాశ కలిగించినా.. చిరు రాక జనాల్లో మరింత ఆసక్తి రేకెత్తించింది.

తొలిసారి బుల్లితెరపై షో చేయబోతున్న చిరు.. టీవీ వీక్షకుల్ని ఎలా మెప్పిస్తాడా అని అంతా ఆసక్తిగా ఎదురు చూస్తున్నారు. ఆల్రెడీ ఎంఈకే నాలుగో సీజన్ ప్రోమోల్లో చిరు ఆకర్షణీయంగా కనిపించాడు. ‘ఖైదీ నెంబర్ 150’ షూటింగ్ జరుగుతుండగానే ఈ షో కోసం డేట్లు కేటాయించిన చిరు.. దాదాపు నెల రోజుల పాటు దీని మీదే ఫోకస్ పెట్టాడు. ముందు నాగార్జున ఇలాంటి షోను ఎలా చేస్తాడో అని సందేహాలు వ్యక్తం చేయగా.. అక్కినేని కథానాయకుడు అందరినీ అంచనాల్ని తలకిందులు చేస్తూ షోను రక్తి కట్టించాడు. ఇప్పుడు చిరుపై అంచనాలు భారీగా ఉన్నాయి. నాగ్ కన్నా బాగా షోను నిర్వహిస్తాడని అభిమానులు ఆశిస్తున్నారు. మరి చిరు హోస్ట్ గా చేయబోతున్న తొలి షోకు ఎలాంటి రెస్పాన్స్ వస్తుందో చూడాలి.

Like Us on Facebook : https://www.facebook.com/Tupakidotcom/