మెగాస్టార్ మాట భలే కలిసొస్తోంది

మెగాస్టార్ చిరంజీవితో మాట సాయం తీసుకోవడం అంటే చిన్న విషయమేమీ కాదు. తన సినిమాలు అయినా.. తన ఫ్యామిలీలోని హీరోలు నటించిన సినిమాలు అయినా.. మాట్లాడేందుకు ముందు ఆ సినిమాను చూసేసి.. ఓ అంచనాకు వచ్చేసి.. రిజల్ట్ గురించి తన ఉద్దేశ్యాన్ని ఇన్ డైరెక్టుగా చెప్పేస్తారు కూడా. ఆయన మాటలన్నీ పొగుడుతున్నట్లుగానే ఉన్నా.. అందులో ఉన్న మీనింగ్ అభిమానులకు అర్ధమైపోతుంది.

ఈ మధ్య కాలంలో తన ఫ్యామిలీ కాకపోయినా.. తన దగ్గరకు వచ్చి ప్రమోషన్ చేయమని అడిగిన వారిని చిరంజీవి నిరుత్సాహపరచడం లేదు. పలు చిత్రాల ప్రచారం ఈయనతో ప్రారంభించినా.. వీటిలో నాగశౌర్య హీరోగా వచ్చిన ఛలో.. సుధీర్ బాబు సమ్మోహం గురించి ప్రత్యేకించి చెప్పుకోవాలి. ఛలో మూవీ ఆడియో ఫంక్షన్ కు చిరంజీవి అటెండ్ కావడమే సంచలనం అయితే.. విపరీతంగా సినిమాను ప్రశంసించి ఆశ్చర్యపరిచారు. నాగశౌర్య విపరీతంగా నమ్మి నిర్మించిన ఈ చిత్రం.. బ్లాక్ బస్టర్ గా నిలిచిన సంగతి తెలిసిందే.

ఇప్పుడు సమ్మోహనం మూవీ విషయంలో కూడా ఇదే రిపీట్ అవుతోంది. ఈ చిత్ర టీజర్ ను చిరు చేతుల మీదుగా లాంఛ్ చేయించి ప్రచారం చేయించారు. ఇంద్రగంటి మేకింగ్ పై చిరంజీవి కురిపించిన ప్రశంసలు.. సమ్మోహనం విజువల్స్ తనకు ఎంతగా నచ్చాయో మెగాస్టార్ చెప్పిన తీరు.. సినిమాపై మరింత ఆసక్తిని పెంచింది. మెగాస్టార్ ఎఫెక్ట్ మూవీ కలెక్షన్స్ పై రిజల్ట్ పై స్పష్టంగానే కనిపిస్తోంది.