చిరుకు షాకిచ్చిన ‘తొలి ప్రేమ’

మెగాస్టార్ చిరంజీవికి ఒకప్పటి ‘తొలి ప్రేమ’ ఒక పెద్ద సర్ప్రైజ్. అప్పటిదాకా తన నీడలో ఉన్న తమ్ముడు పవన్ కళ్యాణ్ సొంత నిర్ణయంతో సినిమా చేసి.. మంచి నటుడిగా రుజువు చేసుకుని.. ఒక క్లాసిక్ హిట్ అందుకున్నాడు ‘తొలి ప్రేమ’తో. ఇప్పుడు అదే పేరుతో తెరకెక్కిన సినిమాతో మెగా ఫ్యామిలీ కుర్రాడు వరుణ్ తేజ్ కూడా మంచి విజయాన్ని ఖాతాలో వేసుకున్నాడు. ఈ సినిమా నటుడిగా అతడిని మరో మెట్టు ఎక్కించింది. ఈ సినిమాను చిరంజీవి కూడా చూశాడట. చూసి ఈ చిత్రాన్ని ఒక కొత్త దర్శకుడు తీశాడా అని ఆశ్చర్యపోయాడట. ఈ విషయాన్ని వరుణ్ తేజే వెల్లడించాడు.

‘తొలి ప్రేమ’ సక్సెస్ మీట్లో వరుణ్ మాట్లాడుతూ.. ‘‘సినిమా చూసిన పెదనాన్న ‘ఏంటి ఈ సినిమా తీసింది కొత్త దర్శకుడా’ అంటూ షాకయ్యారు. అది మాకు పెద్ద కాంప్లిమెంట్. దిల్ రాజు గారు లేకపోతే ఈ సినిమా లేదు. నాపై.. దర్శకుడు వెంకీపై నమ్మకంతో ఈ సినిమాకు రాజు గారు ఇక్కడిదాకా తీసుకొచ్చారు. సినిమాపై వెంకీకి ఉన్న ఇష్టం.. ప్యాషన్ ‘తొలి ప్రేమ’లో కనిపిస్తాయి. రాశి ఖన్నా వర్ష పాత్రలో అద్భుతంగా ఇమిడిపోయింది. తెరపై నాకు రాశి ఖన్నాకు మధ్య కెమిస్ట్రీ చాలా బాగా వర్కవుటైంది. కానీ తెర వెనుక దర్శకుడు వెంకీ.. సంగీత దర్శకుడు తమన్.. సినిమాటోగ్రాఫర్ జార్జ్.. ఈ ముగ్గురి కెమిస్ట్రీ మరింతగా వర్కవుటవడం వల్లే ఈ సినిమా ఇంత బాగా వచ్చింది. వాళ్లు సినిమాను ప్రేమించారు. జనాలు సినమాను ప్రేమించారు’’ అని వరుణ్ అన్నాడు.