ఖైదీ హిట్టయితే మాత్రం అది చరిత్రే

మెగాస్టార్ చాలా గ్యాప్ తర్వాత అంటే 9 ఏళ్ల గ్యాప్ తర్వాత సినీ రంగంలోకి తిరిగి రంగ ప్రవేశం చేస్తున్నారు. మెగా రీ ఎంట్రీ కోసం ప్రతీ ఒక్కరూ ఎదురుచూస్తున్న పరిస్థితి. ఖైదీ నంబర్ 150తో మెగాస్టార్ ఎలాంటి హిట్ కొట్టబోతున్నారు.. తన స్టామినాను ఎలా ప్రూవ్ చేసుకోనున్నారనే ఆసక్తి సర్వత్రా కనిపిస్తోంది.

అసలు ఇంత ఎక్కువ గ్యాప్ తీసుకుని తిరిగి సోలో హీరోగా అరంగేట్రం చేయడం మన దేశంలో బహుశా ఇదే ఫస్ట్ టైం అనుకోవచ్చు. గతంలో రాజేష్ ఖన్నా కూడా కొంత గ్యాప్ తీసుకుని సినిమా చేశారు కానీ.. రీఎంట్రీ అట్టర్ ఫెయిల్యూర్ అయింది. ఆయనే కాదు.. ఇప్పుడు బిగ్ బీ దేశం అంతా ముద్దుగా పిలిపించుకుంటున్న అమితాబ్ కూడా కొంత గ్యాప్ ఇచ్చి.. తిరిగి సోలో హీరోగా ట్రై చేస్తే బాలీవుడ్ జనాలు మెచ్చలేదు. అందుకే ఆ తర్వాత ఆయన సీనియర్ కేరక్టర్లలోకి మారిపోయి.. మళ్లీ బాలీవుడ్ మెగాస్టార్ రేంజ్ ను అందుకున్నారు.

టాలీవుడ్ లో అయితే సూపర్ స్టార్ కృష్ణను చెప్పుకోవాలి. అప్పట్లో ఓసారి నాగ్ కు తండ్రిగా వేస్తే విమర్శలు వచ్చాయని.. తిరిగి హీరోగా సక్సెస్ అయ్యారు. కానీ అదేమీ రీఎంట్రీ కాదు. అప్పటికి వరుసగా సినిమాలు చేస్తున్నారాయన. నెంబర్ వన్.. అమ్మదొంగా.. సంప్రదాయం లాంటి సినిమాల తర్వాత సోలో హీరోగా ఎన్ని ప్రయత్నాలు చేసినా.. రీఎంట్రీలు ఇచ్చినా.. కృష్ణ మాత్రం సక్సెస్ కొట్టలేకపోయారు.

కానీ ఇప్పుడు మెగాస్టార్ చిరంజీవి మాత్రం ఏకంగా 9 ఏళ్ల తర్వాత తిరిగి.. అదే మెగాస్టార్ ఇమేజ్.. అంతకుమించిన హైప్ తో ఖైదీ నంబర్ 150గా ప్రేక్షకుల ముందుకు వస్తున్నారు. పాతికేళ్ల క్రితమే 'బిగ్గర్ దేన్ బచ్చన్' అని కీర్తి గడించిన చిరంజీవి.. ఇప్పుడు రీఎంట్రీలో సక్సెస్ సాధించగలిగితే.. అదే మాట మరోసారి ప్రూవ్ అయినట్లే.


Like Us on Facebook : https://www.facebook.com/Tupakidotcom/