నాగార్జున-అఖిల్ మూవీకి చిరంజీవి నిర్మాత‌?

మెగాస్టార్ చిరంజీవి- రామ్ చ‌ర‌ణ్ జోడీ న‌టించాల్సిన మ‌ల్టీస్టార‌ర్ క‌థ‌లో అక్కినేని నాగార్జున - అఖిల్ జోడీ న‌టించ‌నున్నారా? అంటే అవున‌నే స‌మాచారం.

మెగాస్టార్ చిరంజీవితో అక్కినేని నాగార్జున స్నేహానుబంధం గురించి తెలిసిందే. మెగా అక్కినేని హీరోల స్నేహం ఇండ‌స్ట్రీలో పెద్ద‌రికం గురించి నిరంత‌రం ఏవో క‌థ‌నాలు వ‌స్తూనే ఉన్నాయి.

కానీ వాట‌న్నిటి కంటే భిన్న‌మైన క‌థ‌నం నేడు తార‌స‌ప‌డింది. చిరుతో `గాడ్ ఫాద‌ర్` లాంటి భారీ మ‌ల్టీస్టార‌ర్ ని తెర‌కెక్కిస్తున్న మోహ‌న్ రాజా త‌దుప‌రి చిరు-చ‌ర‌ణ్ ని ఉద్ధేశించి మ‌రో మ‌ల్టీ స్టార‌ర్ క‌థ‌ను రెడీ చేసి దానిని చిరుకి వినిపించార‌ని తెలుస్తోంది.

అయితే చిరంజీవి ఆ సినిమాలో `నాగార్జున‌- అఖిల్` జోడీ న‌టిస్తే బావుంటుంద‌ని సూచించార‌ట‌. అంతేకాదు తాను నిర్మాత‌గా వ్య‌వ‌హ‌రిస్తాన‌ని మోహ‌న్ రాజాకు మాటిచ్చార‌నేది గుస‌గుస‌.

నాగార్జున లాంటి స్టైలిష్ హీరో ఆ క‌థ‌కు అవ‌స‌ర‌మ‌ని తాను భావించి మోహ‌న్ రాజాకు ఈ సూచ‌న చేశార‌ని తెలిసింది. ఇక ఈ క‌థ‌ను విని నాగ్- అఖిల్ కూడా వెంట‌నే ఓకే చెప్పార‌ని గుస‌గుస‌లు వినిపిస్తున్నాయి. అన్నీ సవ్యంగా జరిగితే మెగాస్టార్ చిరంజీవి ఈ చిత్రాన్ని కొణిదెల ప్రొడక్షన్స్ బ్యానర్ పై నిర్మిస్తారు.

నాగ్ కి చెందిన‌ అన్నపూర్ణ స్టూడియోస్ కూడా భాగస్వామిగా ఉంటుంది. ఈ వార్తలకు సంబంధించిన మరిన్ని వివరాలు అధికారికంగా తెలియాల్సి ఉంది. లాల్ సింగ్ చ‌డ్డాకు చిరు స‌మ‌ర్ప‌కుడిగా వ్య‌వ‌హ‌రిస్తుండ‌గా నాగ్ ఈ మూవీకి ప్ర‌చారం హోరెత్తిస్తున్న సంగ‌తి తెలిసిందే. అక్కినేని నాగ‌చైత‌న్య హిందీ డెబ్యూ సినిమా కావ‌డంతో అంద‌రు స్టార్ల నుంచి బోలెడంత ప్ర‌చార సాయం ద‌క్కుతోంది.