దిల్ రాజూ.. ఒక్క ఛాన్స్ ఇవ్వవా ప్లీజ్-చిరు

మెగాస్టార్ చిరంజీవితో సినిమా చేయడాన్ని ఏ నిర్మాత అయినా అదృష్టంగా భావిస్తాడు. దాన్నొక లైఫ్ టైం ఛాన్స్ లా ఫీలవుతాడు. ఎనిమిదేళ్లు సినిమాలకు దూరంగా ఉన్నా.. ఇప్పుడు కూడా చిరు చేస్తానంటే సినిమా తీయడానికి నిర్మాతలు క్యూ కట్టేస్తారు. చిరుతో సినిమా చేయాలని ఆశ పడుతున్న నిర్మాతల్లో దిల్ రాజు కూడా ఒకడు. సుబ్రమణ్యం ఫర్ సేల్ ఆడియో ఫంక్షన్ లో తన కోరికను బయటపెట్టాడు రాజు. 150వ సినిమా తర్వాత తనకు అవకాశమివ్వాలని కోరాడు. ఐతే చివర్లో మాట్లాడిన చిరంజీవి.. రివర్స్ లో రాజునే ఒక్క ఛాన్స్ ఇవ్వరా ప్లీజ్ అని అడిగి.. షాకిచ్చాడు. దీంతో దిల్ రాజు మైండ్ బ్లాంక్ అయిపోయింది. స్టేజ్ మీద ఆనందంతో ఉబ్బితబ్బిబ్బయిపోయాడు. ఈ మాటతో పాటు రాజును ఆకాశానికెత్తేస్తూ గొప్పగా మాట్లాడాడు చిరు.

‘‘దిల్ రాజు తొందరపడి తనకో అవకాశమివ్వమని అడిగాడు. కానీ అతను అడక్కపోయి ఉంటే.. నేనే అడిగేవాణ్ని. తన బేనర్ లో నాతో సినిమా తీయమని. ఇప్పుడు నిజంగానే అడుగుతున్నా. దిల్ రాజు గారూ నాకో ఛాన్స్ ఇవ్వండి ప్లీజ్. దిల్ రాజు లాంటి ప్రొడ్యూసర్ నాకు దొరకాలని నేను నిజంగానే అనుకున్నా. రాజు గురించి.. అతడి కథల ఎంపిక గురించి.. సినిమాలో ఇన్వాల్వ్ అయ్యే తీరు గురించి మా ఫ్యామిలీ హీరోల నుంచి ఇంకా చాలామంది నుంచి విన్నాను. విజయా, జగపతి, సురేష్ ప్రొడక్షన్స్, అశ్వనీదత్, గీతా ఆర్ట్స్ లాంటి సంస్థల తర్వాత ఈ తరంలో అంత పేరు తెచ్చుకున్నది దిల్ రాజు బేనర్. ఈ రోజు శ్రీ వెంకటేశ్వర క్రియేషన్స్ బేనర్ ఈ స్థాయిలో ఉందంటే అందుకు రాజు ప్రతిభాపాటవాలే కారణం. ఈ రోజుల్లో ఇలాంటి బేనర్ మరొకటి లేదని చెప్పడం అతిశయోక్తి కాదు, ఇంకెవర్నీ తక్కువ చేయడం కాదు. దిల్ రాజు లాంటి నిర్మాతలుండాలి. నిర్మాత అంటే ప్రపోజల్ మేకర్ కాదు. అన్నీ తానై చూసుకునేవాడు. దిల్ రాజు అలాంటి నిర్మాత. అలాంటి నిర్మాతతో సినిమా చేయడం సాయిధరమ్ అదృష్టం. తన అపజయాల గురించి కూడా మొహమాటం లేకుండా ఒప్పుకోవడం గొప్ప విషయం’’ అంటూ రాజును ఆకాశానికెత్తేశాడు మెగాస్టార్.