రెండో చిరు కనిపించలేదే!!

ఖైదీ నంబర్ 150 ప్రీరిలీజ్ ఈవెంట్ లో ఇది నా కంబ్యాక్ మూవీ అంటూ మెగాస్టార్ స్వయంగా చెప్పేశారు. జనాల తొక్కిసలాటతో ఫంక్షన్ కాసింత హడావిడిగా ముగించినా.. మెగాభిమానులు మాత్రం తెగ ఖుషీగా ఉన్నారు. మెగాఫ్యాన్స్ ఆనందానికి మరో కారణం.. ఖైదీ నంబర్ 150 ధియేట్రికల్ ట్రైలర్ అదిరిపోవడమే.

అయితే.. ఈ ట్రైలర్ లో మాస్.. డ్యాన్స్.. రొమాన్స్.. అన్నీ చూపించేశారు. కానీ గమనించాల్సిన విషయం ఏంటంటే.. ఈ ట్రైలర్ లో చూపించినది కూడా చిరు చేసిన ఒక కేరక్టర్ ని మాత్రమే. అసలు చిరు ఈ పోరాటానికి దిగడానికి కారణమైన మరో చిరంజీవి పాత్ర ఉంటుంది. ఆ రోల్ ను టీజర్ నుంచి పోస్టర్ల వరకూ ఎక్కడా చూపించలేదు. ఇప్పుడు థియేట్రికల్ ట్రైలర్ లో కూడా ఆ రోల్ ని రివీల్ చేయలేదు. ఆ రోల్ నిడివి తక్కువ గానే ఉంటుంది కానీ.. మూవీ బేస్ ఆ కేరక్టరే.

అలాంటి ఇంపార్టెంట్ కేరక్టర్ ను అసలు చూపించకుండానే ఇంత హైప్ తీసుకుచ్చేసింది మెగా టీం. అసలు ఆ పాత్రను ఇంకా చూపించకపోవడానికి కారణం ఏంటనేది మాత్రం తెలియడం లేదు. ఈ పాత్ర కోసం ప్రత్యేకంగా ఏమైనా జాగ్రత్తలు తీసుకున్నారా.. ఫ్యాన్స్ కి ఆ థ్రిల్ థియేటర్ లో కలిగించడానికే దాచిపెట్టారా అనిపించక మానదు.