సైరా ఫస్ట్ లుక్ ఆ రోజే..

మెగాస్టార్ చిరంజీవి కెరీర్లో అత్యంత ప్రతిష్టాత్మకంగా తెరకెక్కుతున్న సినిమా ‘సైరా నరసింహారెడ్డి’. రీఎంట్రీ కోసం ముందుగా ‘ఖైదీ నంబర్ 150’ లాంటి రీమేక్ మూవీని ఎంచుకుని సేఫ్ గేమ్ ఆడిన చిరు.. ఆ తర్వాత మాత్రం పెద్ద సాహసాన్నే నెత్తికెత్తుకున్నాడు. స్వాతంత్ర్య సమరయోధుడు ఉయ్యాలవాడ నరసింహారెడ్డి జీవిత కథతో ‘సైరా’ చేయడానికి నిర్ణయించుకున్నాడు. ఏకంగా రూ.200 కోట్ల బడ్జెట్లో తెరకెక్కుతున్న సినిమా ఇది. దీనికి సురేందర్ రెడ్డి లాంటి రెగ్యులర్ సినిమాలు తీసే దర్శకుడిని ఎంచుకోవడం ఒక పెద్ద సాహసం. సొంత బేనర్లో ఈ సినిమా చేయడమూ ఇంకా సాహసం. ఈ సినిమా కోసం చిరు ఎంత శ్రమిస్తున్నాడో చిత్ర యూనిట్ సభ్యులు కథలు కథలుగా చెబుుతున్నారు. ఇప్పటికే సగం దాకా చిత్రీకరణ పూర్తయినట్లు సమాచారం.

గురువారం నుంచే ‘సైరా’ కొత్త షెడ్యూల్ మొదలవుతోంది. 40 రోజుల పాటు సాగే ఈ షెడ్యూల్లో కీలక సన్నివేశాలు చిత్రీకరించనున్నారట. ప్రధానంగా యాక్షన్ సన్నివేశాలు తీస్తారంటున్నారు. మరోవైపు ఈ చిత్ర ఫస్ట్ లుక్ ఎప్పుడు రిలీజ్ చేయాలనే విషయంలో దర్శకుడు సురేందర్ రెడ్డి.. నిర్మాత రామ్ చరణ్ ఒక నిర్ణయానికి వచ్చేసినట్లు సమాచారం. ఆగస్టు 22న మెగాస్టార్ పుట్టిన రోజు కానుకగా ఒక బ్రహ్మాండమైన ఫస్ట్ లుక్ రిలీజ్ చేసి అభిమానుల్ని సంబరాల్లో ముంచెత్తాలని భావిస్తున్నారట. చిరు పుట్టిన రోజుకు ఆటోమేటిగ్గా అభిమానులు ఇలాంటి కానుకే కోరుకుంటారు. వాళ్లను సంతోషపెట్టడానికి ఇప్పటి నుంచే వర్క్ నడుస్తోందని సమాచారం. ముందు ఈ చిత్రాన్ని వచ్చే సంక్రాంతికి విడుదల చేయాలనుకున్నారు. కానీ అప్పటికి హడావుడి అవుతుందని భావించి.. మనసు మార్చుకుని వచ్చే వేసవికి సినిమాను రిలీజ్ చేయాలని ఫిక్సయినట్లు సమాచారం.