మెగాస్టార్ చాలా ఏళ్ళ తర్వాత అలాంటి సినిమాతో రాబోతున్నాడా..?

మెగాస్టార్ చిరంజీవి - డైరెక్టర్‌ బాబీ (కె.ఎస్‌. రవీంద్ర) కాంబినేషన్ లో ఓ సినిమా తెరకెక్కనున్న విషయం తెలిసిందే. మైత్రీ మూవీ మేకర్స్‌ బ్యానర్‌ లో ఈ సినిమా ఉంటుందని ఇటీవలే అధికారికంగా ప్రకటించారు. ప్రస్తుతం చిరు కొరటాల శివ దర్శకత్వంలో 'ఆచార్య' సినిమా చేస్తున్నాడు. దీని తర్వాత మోహన్ రాజా డైరెక్షన్ లో 'లూసిఫర్' రీమేక్ - మెహర్ రమేష్ తో 'వేదళమ్' రీమేక్ లలో నటించనున్నాడు. ఆ తరవాత బాబీతో సినిమా స్టార్ట్ అయ్యే అవకాశాలు ఉన్నాయి. అయితే ఈ సినిమా నేపథ్యం గురించి సోషల్ మీడియాలో ఓ న్యూస్ చక్కర్లు కొడుతోంది.

చిరంజీవి - బాబీ కాంబోలో రానున్న సినిమా గ్రామీణ నేపథ్యంలో సాగే ఎంటర్టైనర్ అని టాక్ నడుస్తోంది. బాబీ తెరకెక్కించిన 'జై లవకుశ' 'వెంకీమామ' సినిమాల తరహాలో ఎమోషన్‌ తో కూడిన ఫ్యామిలీ ఎంటర్‌టైనర్‌ గా ఉండబోతోందట. 90స్ లో అలాంటి సినిమాల్లో నటించిన మెగాస్టార్.. ఆ తర్వాత పెద్దగా రూరల్ బ్యాక్ డ్రాప్ ఎంటర్టైనర్స్ ని టచ్ చేయలేదు. ఇప్పుడు బాబీతో చేయడానికి ఒప్పుకున్నాడని అంటున్నారు. ఇక ఈ చిత్రానికి ప్రముఖ రచయిత కోన వెంకట్‌ స్క్రీన్‌ ప్లే మరియు మాటలు అందిస్తారని వార్తలు వస్తున్నాయి. మరి ఇందులో నిజానిజాలు తెలియాలంటే ఇంకొన్నాళ్లు ఆగాల్సిందే.