అవార్డుకే పరిపూర్ణత వచ్చింది -చిరంజీవి

ఎన్నో అత్యుత్తమ చిత్రాలను అందించిన సీనియర్ దర్శకుడు కె. విశ్వనాథ్ కు దాదా సాహెబ్ ఫాల్కే అవార్డు దక్కడంపై.. టాలీవుడ్ అంతా హర్షాతిరేకాలు వ్యక్తం చేస్తోంది. కళాతపస్వికి దక్కిన ఈ గౌరవంపై తెలుగు సినిమా పరిశ్రమ అంతా తమ ఆనందాన్ని తెలియచేస్తోంది.

హీరో ఎవరైనా.. స్టార్ లు నటించినా.. కె. విశ్వనాథ్ తన తీరు మార్చుకోకుండా సినిమాలు తెరకెక్కించిన తీరు అసామాన్యం. మెగాస్టార్ తో కూడా కొన్ని చిత్రాలు తీశారాయన. ఇప్పుడు కళాతపస్వికి దాదాసాహెబ్ ఫాల్కే అవార్డ్ దక్కడంపై.. చిరంజీవి స్వయంగా ఆయన ఇంటికి వెళ్లి మరీ అభినందనలు తెలియ చేశారు. 'మా ఇద్దరి రిలేషన్ ఎంతో ప్రత్యేకమైనది. ఓ డైరెక్టర్.. యాక్టర్ గా కాకుండా.. సొంత కుటుంబసభ్యుల్లా మేముం ఉంటాం. ఆయనకు ఈ పురస్కారం ఎప్పుడో రావాల్సి ఉంది. ఇప్పుడు ఆయనకు దాదా సాహెబ్ ఫాల్కే అవార్డ్ ప్రకటించడం అంటే.. ఆ అవార్డ్ కే నిండుదనం.. పరిపూర్ణత లభించినట్లయింది' అన్నారు చిరంజీవి.

విశ్వనాథ్ ఇంటికి స్వయంగా వెళ్లిన చిరు.. ఆయనకు ఫ్లవర్ బొకే ఇచ్చి అభినందనలు తెలియచేశారు. ఇద్దరూ కలిసి అలనాటి జ్ఞాపకాలను గుర్తు చేసుకున్నారు. చిరంజీవిపై విశ్వనాథ్ చూపించిన ప్రేమ.. ఆప్యాయతలు అక్కడున్న వారిని ఆశ్చర్యానికి గురి చేశాయి.

Like Us on Facebook : https://www.facebook.com/Tupakidotcom/