బాలయ్య కంపోజర్ సంచలన వ్యాఖ్యలు

నందమూరి బాలకృష్ణ నటిస్తున్న వందో సినిమా గౌతమిపుత్ర శాతకర్ణికి.. చిరంతన్ భట్ సంగీతం అందిస్తున్న విషయం పాత సంగతే. అయితే.. బాలయ్యకు ఛార్ట్ బస్టర్ ట్యూన్స్ ను.. బ్లాక్ బస్టర్ మ్యూజిక్ ను ఇవ్వడం సాధ్యం కాదంటున్నాడు ఈ కంపోజర్. అనడమే కాదు.. అందుకు రీజన్ కూడా డీటైల్డ్ గానే చెప్పాడు.

దర్శకుడు క్రిష్ తో కలిసి గతంలో కంచె చిత్రం కోసం పని చేశాడు చిరంతన్ భట్. ఇప్పుడు గౌతమిపుత్ర శాతకర్ణి కోసం కూడా మళ్లీ ట్రావెల్ చేస్తున్నాడు. ఈ రెండు పీరియాడిక్ చిత్రాలే కావడం విశేషం. 'పీరియాడిక్ ఫిలిమ్స్ తో ప్రయోగాలకు ఎక్కువ స్కోప్ ఉండదు. నాకు కొన్ని పరిధులు.. పరిమితులు ఏర్పడిపోతాయి. అన్ని ఇన్‌ స్ట్రుమెంట్స్ వాడలేను. మెలోడీలపైనే డిపెండ్ అవాల్సి ఉంటుంది. అయినా సరే మంచి మ్యూజిక్ ఇచ్చి ఆకట్టుకోవాల్సిన బాధ్యత నాపై ఉంది. అందుకే గౌతమిపుత్ర శాతకర్ణికి వర్క్ చేయడం ఇంట్రెస్టింగ్ మాత్రమే కాదు.. ఛాలెంజింగ్ కూడా' అంటున్నాడు చిరంతన్ భట్.

రెగ్యులర్ ప్రాజెక్టులకు ఎవరైనా మంచి మ్యూజిక్ ఇస్తారన్న ఈ కంపోజర్.. కొన్ని శతాబ్దాల క్రితం జరిగిన కథకు సంగీతం అందించేటపుడు సవాల్ ఎదురవుతుందని అన్నాడు. కంచెకు వర్క్ చేయడం ప్రారంభించినపుడే.. ఛార్ట్ బస్టర్స్ ఇవ్వాలని కోరుకోలేదన్న చిరంతన్ భట్.. ఇప్పుడు బాలయ్య సినిమాకి కూడా అదే స్ట్రాటజీ పాటిస్తానంటూ సంచలన వ్యాఖ్యలు చేశాడు. ''ఛార్ట్ బస్టర్స్ లేకుండానే.. మంచి మ్యూజిక్ ఇవ్వడమే తన టార్గెట్'' అని చెబుతున్నాడు చిరంతన్ భట్.