సుమ హోస్ట్ గా చిరు బర్త్‌ డే ట్విట్టర్ స్పేస్‌

కరోనా కారణంగా ఈమద్య కాలంలో సినిమా వేడుకలను అభిమానులు చాలా మిస్ అవుతున్నారు. అప్పట్లో ప్రతి వారం ఏదో ఒక సినిమా వేడుక ఉండేది. కాని ఇప్పుడు కరోనా వల్ల సినిమా విడుదల సాధ్యం కావడం లేదు. అభిమానులు సోషల్‌ మీడియాలో ఈ మద్య కాలంలో తమ అభిమాన హీరోలకు సంబంధించిన విషయాలను చర్చించుకుంటూ.. పంచుకుంటూ రికార్డులు సృష్టిస్తూ టైమ్ పాస్ చేస్తున్నారు. ఈ సమయంలో ట్విట్టర్ లో వచ్చిన కొత్త ఆప్షన్ ప్రస్తుతం అందరి దృష్టిని ఆకర్షిస్తోంది. అభిమానులు వేలాది మంది ఒకేసారి కలిసి పాల్గొన్న మీటింగ్‌ ను ట్విట్టర్ స్పేస్ పేరుతో తీసుకు వచ్చారు.

మహేష్‌ బాబు పుట్టిన రోజు సందర్బంగా ప్రదీప్ హోస్ట్ గా సూపర్ ఫ్యాన్స్ ఈ ట్విట్టర్‌ స్పేస్ ను క్రియేట్‌ చేశారు. పెద్ద ఎత్తున అభిమానులు పాల్గొన్న ఆ స్పేస్ లో మహేష్‌ బాబు భార్య మరియు కూతురు కూడా పాల్గొని మాట్లాడారు. అభిమానులు మరియు ఇండస్ట్రీ వర్గాల వారు ఈ పద్దతిలో తమ అభిప్రాయాలను షేర్‌ చేసుకోవడం చాలా కొత్తగా ఉందంటూ ఆనందం వ్యక్తం చేస్తున్నారు. తాజాగా చిరంజీవి పుట్టిన రోజుకు కూడా ఈ ట్విట్టర్ స్పేస్ ను ఏర్పాటు చేయబోతున్నట్లుగా అధికారికంగా ప్రకటన వచ్చింది.

సుమ హోస్ట్‌ గా వ్యవహరించబోతున్న మెగా ట్విట్టర్‌ స్పేస్ లో ప్రముఖులు తమ స్పీచ్ ఇవ్వబోతున్నారు. చిరంజీవి పుట్టిన రోజు అయిన ఆగస్టు 22వ తారీకున సాయంత్రం 7.02 కు రాఘవేంద్ర రావు.. వి వి వినాయక్‌.. అనీల్ రావిపూడి.. సందీప్ వంగ.. మెహర్‌ రమేష్‌.. క్రిష్‌.. బాబీ.. హరీష్‌ శంకర్‌.. శ్రీను వైట్ల.. మారుతి.. గోపీచంద్‌ మలినేని మరియు అజయ్‌ భూపతి ఇంకా మెగా ఫ్యామిలీకి చెందిన వారు తమ అభిప్రాయాలను షేర్‌ చేసుకునేందుకు రాబోతున్నారు. ఈ స్పేస్ లో మెగా ఫ్యాన్స్ కనీసం 50 వేల మంది అయినా పాల్గొంటారు అనే నమ్మంతో అంతా ఉన్నారు. ఈ సంఖ్య మరింత పెరిగినా ఆశ్చర్యం లేదు.