'పుష్ప' టీజర్ పై చిరు స్పందన.. 'చికాబాబి' అంటూ బన్నీ ట్వీట్..!

స్టైలిష్ స్టార్ అల్లు అర్జున్ - రష్మికా మందన్నా జంటగా నటిస్తున్న లేటెస్ట్ యాక్షన్ థ్రిల్లర్ డ్రామా ఫిలిం ''పుష్ప''. డైరెక్టర్ సుకుమార్ తెరకెక్కస్తున్న ఈ చిత్రాన్ని మైత్రీ మూవీ మేకర్స్ బ్యానర్ పై నవీన్ ఎర్నేని - వై.రవి శంకర్ భారీ బడ్జెట్ తో నిర్మిస్తున్నారు. ముత్యం శెట్టి మీడియా వారు నిర్మాణంలో భాగస్వాములుగా వ్వవహరిస్తున్నారు. ఎర్ర చందనం స్మగ్లింగ్‌ నేపథ్యంలో రూపొందుతోన్న ఈ చిత్రంలో లారీ డ్రైవర్‌ పుష్పరాజ్ పాత్రలో బన్నీ కనిపించనున్నాడు. అయితే నేడు అల్లు అర్జున్ బర్త్ డే సందర్భంగా బుధవారం పుష్ప టీజర్ ని విడుదల చేసారు. 'తగ్గేదే లే' అంటూ వచ్చిన ఈ టీజర్ అంచనాలకు ఏ మాత్రం తగ్గకుండా ఉందని కామెంట్స్ వస్తున్నాయి. ఇక మెగాస్టార్ చిరంజీవి సైతం ఈ టీజర్ పై తనదైన శైలిలో స్పందించారు.

చిరంజీవి ట్విట్టర్ వేదికగా స్పందిస్తూ.. ''పుష్ప టీజర్ చూసానను. చాలా రియలిస్టిక్ అండ్ రస్టిక్ గా ఉంది. పుష్ప రాజ్ గా అల్లు అర్జున్ తగ్గేది లే. హ్యాపీ బర్త్ డే మై డియర్ బన్నీ'' అని పేర్కొన్నారు. ప్రస్తుతం ఈ ట్వీట్ సోషల్ మీడియాలో వైరల్ అవుతోంది. అయితే దీనిపై బన్నీ కూడా రియాక్ట్ అయ్యాడు. ''థాంక్యూ సో మచ్ చికాబాబీ. మీ విషెస్ ఈ రోజును మరింత స్పెషల్ గా మార్చాయి'' అని ట్వీట్ చేసాడు అల్లుఅర్జున్. ఇకపోతే 'పుష్ప' టీజర్ ప్రస్తుతం యూట్యూబ్ లో 12 మిలియన్లకు పైగా వ్యూస్ తో ట్రెండింగ్ లో కొనసాగుతోంది. ఈ చిత్రాన్ని తెలుగు, తమిళం, మలయాళం, కన్నడం, హిందీ భాషల్లో ఆగస్టు 13న వరల్డ్ వైడ్ గా విడుదల చేయనున్నారు.