లేటెస్ట్ క్లిక్: ప్రైవేట్ పార్టీలో చిరు - వెంకీలతో సల్లూ భాయ్..!

టాలీవుడ్ సెలబ్రిటీలు అందరూ ఇతర ఇండస్ట్రీలలోని ప్రముఖులతో మంచి సాన్నిహిత్యాన్ని మెయింటైన్ చేస్తూ వస్తుంటారు. సందర్భం వచ్చినప్పుడల్లా ఆత్మీయంగా వారిని కలుస్తూ ఒకరిపై ఒకరికున్న అభిమానాన్ని చాటుకుంటుంటారు.

బాలీవుడ్ స్టార్ హీరో సల్మాన్ ఖాన్ కు తెలుగు చిత్ర పరిశ్రమలో చాలామందితో ఫ్రెండ్ షిప్ ఉందనే సంగతి తెలిసిందే. ముఖ్యంగా మెగాస్టార్ చిరంజీవి - విక్టరీ వెంకటేష్ లతో సల్లూ భాయ్ చాలా క్లోజ్ గా ఉంటారు.

ప్రస్తుతం సల్మాన్ ఖాన్ తన కొత్త సినిమా 'కభీ ఈడీ కబీ దివాలీ' షూటింగ్ కోసం హైదరాబాద్ లో ఉన్నారు. చాలా రోజుల తర్వాత నగరానికి రావడం.. ఎక్కువ రోజులు టైం స్పెండ్ చేస్తుండటంతో.. ఇక్కడ తన సన్నిహితులందరినీ మీట్ అవుతున్నారు.

లేటెస్టుగా చిరంజీవి - వెంకటేష్‌ లను కలిశాడు సల్మాన్ ఖాన్. ముగ్గురూ ఓ ప్రైవేట్ పార్టీలో కలుసుకొని సరదా సమయాన్ని గడిపారు. దీనికి సంబంధించిన ఫోటోలు సోషల్ మీడియాలో చక్కర్లు కొడుతున్నాయి. ఇందులో వీరితో పాటుగా జెసి పవన్ రెడ్డిని కూడా గమనించవచ్చు.

ఇటీవల 'విక్రమ్' సినిమా సక్సెస్ అయినందున చిరంజీవి తన నివాసంలో కమల్ హాసన్ - డైరెక్టర్ లోకేష్ కనగరాజ్ తో సహా పలువురు సినీ ప్రముఖులకు విందు ఏర్పాటు చేసిన సంగతి తెలిసిందే. దీనికి సల్మాన్ కూడా హాజరయ్యారు. ఇప్పుడు మరోసారి టాలీవుడ్ స్టార్స్ తో కలిసి పార్టీలో పాల్గొన్నారు.

ఇకపోతే సల్మాన్ ఖాన్ తొలిసారిగా చిరు మరియు వెంకీ లతో స్క్రీన్ షేర్ చేసుకోబోతున్నారు. మోహన్ రాజా దర్శకత్వంలో ప్రస్తుతం మెగాస్టార్ నటిస్తున్న 'గాడ్ ఫాదర్' సినిమాలో సల్లూ భాయ్ కీలక పాత్ర పోషిస్తున్నారు. ఇది బాలీవుడ్ స్టార్ కు తెలుగు డెబ్యూ. ఇప్పటికే ఆయన పాత్రకు సంబంధించిన షూటింగ్ కూడా కంప్లీట్ అయింది.

మరోవైపు 'కభీ ఈడీ కబీ దివాళీ' సినిమాలో సల్మాన్ తో పాటుగా వెంకటేష్ ఓ ముఖ్య పాత్రలో కనిపించనున్నారు. ఫర్హాద్ సాంజి దర్శకత్వం వహిస్తున్న ఈ సినిమాలో పూజా హెగ్డే హీరోయిన్ గా నటిస్తుండగా.. సల్మాన్ కు సోదరుడిగా వెంకీ కనిపిస్తారని టాక్ ఉంది. ఎప్పటి నుంచో కలిసి నటించాలనుకుంటున్న ఈ క్లోజ్ ఫ్రెండ్స్.. ఇన్నాళ్లకు సరైన స్క్రిప్ట్ దొరకడంతో స్క్రీన్ షేర్ చేసుకోడానికి రెడీ అయ్యారని తెలుస్తోంది.

ఇకపోతే సల్మాన్ ఖాన్ సినిమాలో మెగా పవర్ స్టార్ రామ్ చరణ్ కూడా గెస్ట్ రోల్ లో కనిపిస్తారని గత రెండు రోజులుగా సోషల్ మీడియాలో వార్తలు వినిపిస్తున్నాయి. ఇందులో నిజమెంతో తెలియదు కానీ.. చిరు - వెంకీ లతో సినిమాలు చేస్తూ తెలుగు ప్రేక్షకులకు మరింత దగ్గర కానున్నాడు సల్మాన్. రియర్ లైఫ్ లో ఫ్రెండ్స్ గా ఉన్న వీరు ముగ్గురూ.. బిగ్ స్క్రీన్ మీద ఎలాంటి మ్యాజిక్ క్రియేట్ చేస్తారో చూడాలి.