కొత్త పిల్ల కత్తిలా ఉందంటున్నారు..

తెలుగు ఇండస్ట్రీలోకి చాలామందే హీరోయిన్స్ వస్తుంటారు కానీ.. వచ్చీ రావడంతోనే తమ ముద్ర వేయగలిగిన వాళ్లు చాలా తక్కువమందే ఉంటారు. అసలు ఒక సినిమా కూడా విడుదల కాకుండానే.. ఇండస్ట్రీని అట్రాక్ట్ చేసిన వాళ్ల లిస్ట్ అయితే చాలా అంటే చాలా చిన్నది ఉంటుంది. ఇప్పుడు చిత్ర శుక్లా అనే భామ గురించి టాలీవుడ్ ఇలాగే మాట్లాడుకుంటోంది.

శ్రీవిష్ణు హీరోగా వెన్నెల క్రియేషన్స్ బ్యానర్ పై తెరకెక్కుతున్న సినిమాతో చిత్ర శుక్లా అనే కొత్త హీరోయిన్ పరిచయం అవుతోంది. ప్రస్తుతం ఫస్ట్ షెడ్యూల్ కంప్లీట్ చేసుకున్న ఈ మూవీకి సంబంధించి కొన్ని పోస్టర్స్ ని రిలీజ్ చేశారు. వైజాగ్ పరిసరాల్లో షూట్ చేసిన ఓ పాటకు సంబంధించిన ఫోటోలు ఇప్పుడు కనిపిస్తున్నాయి. కొత్త దర్శకుడు కుమార్ ఈ మూవీని తెరకెక్కిస్తుండగా.. ఒకట్రెండు ఫోటోల్లో కనిపించిన లుక్ తోనే చిత్ర శుక్లాకి మంచి రెప్యుటేషన్ వచ్చేసింది. ఈ భామను ఇప్పటికే నిర్మాతలు సంప్రదింపులు మొదలుపెట్టేశారంటే.. కొత్త గ్లామర్ ఎంతలా అట్రాక్ట్ చేస్తోందో అర్ధమవుతుంది.

ఇప్పటికే నారా రోహిత్ సరసన నటించేందుకుగానూ ఓ ఆఫర్ ఈ కొత్త పిల్ల ముంగిట్లో వాలిందని తెలుస్తోంది. గ్లామర్ పరంగా చాలానే మార్కులు పడ్డాయ్ కానీ.. పెర్ఫామెన్స్ లో కూడా ప్రూవ్ చేసుకోగలిగితే.. కొత్త పిల్ల చిత్రశుక్లాకి బోలెడంత ఫ్యూచర్ ఉందని ఇండస్ట్రీ జనాలు అనుకుంటున్నారు.