నరేష్ అండ్ సునీల్.. హీరోయిన్ దొరికింది

అల్లరి నరేష్.. సునీల్ ఇద్దరూ మంచి కామెడీ టైమింగ్ ఉన్న హీరోలు. కేవలం హాస్యంతోనే హీరోలుగా స్టార్ పొజిషన్ కు చేరుకున్నారు. కానీ వీళ్లిద్దరికీ ఈ మధ్య టైం అస్సలు కలిసిరావడం లేదు. హిట్ అన్నది అందని ద్రాక్షలా మారింది. ఎన్ని ప్రయత్నాలు చేసినా కెరీర్ లో అంకె మారుతోందే అదృష్టం కలిసిరావట్లేదు.

ప్రస్తుతం కెరీర్ లో హిట్ అత్యంత కీలకమైన ఈ తరుణంలో వీళ్లిద్దరూ కలిసి ఓ సినిమా చేస్తున్నారు. ఈ సినిమాను భీమినేని శ్రీనివాసరావు డైరెక్ట్ చేయబోతున్నాడు. ఇందులో ఇద్దరు హీరోయిన్లు ఉండగా.. ఇప్పటికే ఒక హీరోయిన్ నందినిరాయ్ ని కన్ఫర్మ్ చేశారు. రెండో హీరోయిన్ గా కాస్త నటనతో మెప్పించగలిగే సొగసరి కోసం వెతుకుతున్నారు. చివరకు రంగులరాట్నం ఫేం చిత్ర శుక్లాను ఓకే చేశారు. రంగులరాట్నంలో లైఫ్ పై క్లారిటీ ఉన్న నేటితరం యువతిగా చిత్ర శుక్ల బాగానే ఆకట్టుకుంది. నటనపరంగా ఆమెకు మంచి మార్కులే పడ్డాయి. చిత్ర శుక్ల నాచురల్ గా ఉంటూ అందంగా కనిపించడంతోపాటు ముఖంలో భావాలు పలికే నటి కావడంతోనే భీమినేని ఆమెను ఎంపిక చేసుకున్నాడని సినిమా యూనిట్ సభ్యుడొకరు తెలిపారు.

మధ్య ప్రదేశ్ కు చెందిన చిత్ర శుక్ల రంగులరాట్నం సినిమాపై చాలా ఆశలే పెట్టుకుంది. పెద్ద బ్యానర్ లో సినిమా కావడంతో ఆ సినిమా హిట్టయితే టాలీవుడ్ లో గుర్తింపు వస్తుందని ఆశించింది. కానీ రంగులరాట్నం బాక్సాఫీసు వద్ద బోల్తా కొట్టింది. కానీ చిత్రకు మాత్రం ఇంకో అవకాశం తెచ్చి పెట్టింది.