శ్రీమంతుడంటే భయం లేదా?

మహేష్ సినిమా అంటే మామూలుగానే బాక్సాఫీస్ దగ్గర హడావుడి మామూలుగా ఉండదు. అలాంటిది ‘శ్రీమంతుడు’ సినిమాకు సూపర్ హిట్ టాక్ వచ్చింది. వీక్ డేస్ లోనూ సినిమా దుమ్ము దులిపేస్తోంది. రెండో వీకెండ్ లోనూ ‘శ్రీమంతుడు’ జోరు చూపించడం ఖాయంగా కనిపిస్తోంది. ఇది ఏదో ఒక వర్గానికో పరిమితమయ్యే సినిమా కూడా కాదు. యూత్, యాక్షన్, ఫ్యామిలీ.. ఇలా ఏ వర్గం ప్రేక్షకులకైనా నచ్చేలా ఉంది శ్రీమంతుడు.

మరి ఇలాంటి సినిమా థియేటర్లలో ఉన్నప్పటికీ ఈ శుక్రవారం రెండు చెప్పుకోదగ్గ సినిమాలు ప్రేక్షకుల ముందుకొస్తున్నాయి. ఈ రెండు సినిమాల మీద కూడా మంచి అంచనాలుండటం విశేషం. ఉయ్యాల జంపాల జంట రాజ్ తరుణ్, అవికా గోర్ మరోసారి జతకట్టిన సినిమా ‘సినిమా చూపిస్త మావ’. ముందు ఈ సినిమాపై పెద్దగా ఆసక్తి లేదు కానీ.. ట్రైలర్ చూశాక, దిల్ రాజుకు భలేగా నచ్చేసి డిస్ట్రిబ్యూషన్ కు ముందుకొచ్చాక అంచనాలు పెరిగాయి. కంటెంట్ మీద ఉన్న కాన్ఫిడెన్స్ తో ‘శ్రీమంతుడు’ వచ్చిన వారానికే సినిమాను రిలీజ్ చేస్తున్నారు. రాజు చెయ్యి పడింది కాబట్టి ఈ సినిమాకు థియేటర్లు బాగానే దొరికాయి.

మరోవైపు కన్నడ సూపర్ స్టార్ ఉపేంద్ర స్వీయ దర్శకత్వంలో తెరకెక్కించిన ‘ఉపేంద్ర-’ కూడా ఈ వారమే వస్తుండటం విశేషం. ముందు ఈ సినిమాను కన్నడతో పాటే తెలుగులోనూ రిలీజ్ చేయాలని ఉపేంద్ర అనుకోలేదు. కానీ నల్లమలుపు శ్రీనివాస్ (బుజ్జి) ఈ సినిమా హక్కులు తీసుకుని.. చకచకా రిలీజ్ కు రెడీ చేసేశాడు. బుజ్జి పలుకుబడి కూడా తక్కువేం కాదు కాబట్టి.. ఈ సినిమాకు కూడా థియేటర్లు బాగానే ఇస్తున్నారు. మరి ఈ సినిమాల వల్ల ‘శ్రీమంతుడు’కి దెబ్బ తగులుతుందా.. లేక శ్రీమంతుడు వల్ల ఈ సినిమాలకు ముప్పు వస్తుందా చూడాలి మరి.