'కాఫీ విత్ క‌రణ్' ఎత్తేశారు.. ఇంత‌లోనే ట్విస్టు!

కొంద‌రి ఉత్తానాన్ని కొంద‌రు పొగుడుతారు. చూస్తుండ‌గానే ప‌త‌న‌మైతే అదే కొంద‌రు ఆనందిస్తారు!! ఇదీ మ‌నిషి స్వ‌భావం. ప్ర‌ముఖ ద‌ర్శ‌క‌నిర్మాత క‌ర‌ణ్ జోహార్ కి ఇలాంటి శ‌త్రువులు త‌న చుట్టూనే ఉన్నారు. క్వీన్ కంగ‌న ర‌నౌత్ బద్ధ‌ శ‌త్రువు అనుకుంటే బ‌య‌టికి తెలియ‌ని శ‌త్రులోకం అత‌డి చుట్టూ చాలా ఉంది. ఇప్పుడు కాఫీ విత్ క‌ర‌ణ్ లాంటి సంచ‌ల‌న షోని ముందుకు సాగ‌నివ్వ‌కుండా ఎత్తేస్తున్నారు అంటే ఆనందించేవాళ్లే ఎక్కువ‌.

అందుకే ఆరు అద్భుతమైన సీజన్ ల తర్వాత కరణ్ జోహార్ హోస్టింగ్ చేస్తున్న కాఫీ విత్ కరణ్ షో త‌న‌ రన్ ని ముగించిందని టాక్ స్ప్రెడ్ అయ్యింది. అయితే ఇంత‌లోనే క‌ర‌ణ్ ఒక ట్విస్టిచ్చాడు.

``కాఫీ విత్ కరణ్ ఇప్పుడు 6 సీజన్ లుగా నా జీవితంలో .. మీ జీవితంలో ఒక భాగమైంది. పాప్ కల్చర్ చరిత్రలో మేం ప్రభావం చూపామని .. మా స్థానాన్ని కూడా నిల‌బెట్టుకున్నామని నేను అనుకుంటున్నాను. కాబట్టి కాఫీ విత్ కరణ్ తిరిగి రాద‌ని బరువెక్కిన హృదయంతో ప్రకటిస్తున్నాను.. `` అని క‌ర‌ణ్ గ‌తంలో వ్యాఖ్యానించ‌డ‌మే దీనికి కార‌ణం. చాట్ షో కొత్త సీజన్ ప్రారంభమైందని ఊహాగానాలు సాగుతుండ‌డంతో అత‌డు క్లారిటీనివ్వాల్సొచ్చింది.

అయితే ఇంత‌లోనే మ‌రో ట్విస్టు. మేము మీకు శుభవార్త అందిస్తున్నాము. ఈ చాట్ షో ఇప్పుడు డిస్నీ ప్ల‌స్ హాట్ స్టార్ లో ప్రసారం చేయనున్నాం! అంటూ వెల్ల‌డించారు. కరణ్ తన సోషల్ మీడియా హ్యాండిల్స్‌లో కాఫీ విత్ కరణ్ డిస్నీ+ హాట్ స్టార్ లో తిరిగి వస్తుందని ధృవీకరించారు. ``కాఫీ విత్ కరణ్ తిరిగి రావడం లేదు…టీవీలో! ప్రతి గొప్ప కథనానికి మంచి ట్విస్ట్ అవసరం కాబట్టి... కాఫీ విత్ కరణ్ సీజన్ 7 డిస్నీ ప్ల‌స్ హాట్ స్టార్ లో ప్రత్యేకంగా ప్రసారం అవుతుందని ప్రకటించడానికి నేను సంతోషిస్తున్నాను!`` అని వ్యాఖ్య‌ను జోడించారు. 2021లో స్ట్రీమింగ్ కోసం కరణ్ జోహార్ కాఫీ విత్ కరణ్ ప్రత్యేక ఎపిసోడ్ లను హోస్టింగ్ చేసారు.

అతను డిస్నీ+ హాట్ స్టార్ సామ్రాజ్యంలో తారాగణాన్ని కాఫీ షాట్స్ విత్ ది ఎంపైర్ పేరుతో ఒక ప్రత్యేక ఎపిసోడ్ కు ఆహ్వానించాడు. తరువాత ధనుష్ - సారా అలీ ఖాన్ కూడా తమ అట్రాంగి రే చిత్రాన్ని ప్రమోట్ చేస్తూ కాఫీ షాట్స్ విత్ అట్రాంగి రే అనే ప్రత్యేక ఎపిసోడ్ లో కనిపించారు. రెండు ఎపిసోడ్ లు డిస్నీ+ హాట్ స్టార్ లో ప్రత్యేకంగా ప్రసారం అయ్యాయి. డిస్నీ సంస్థ‌తో క‌ర‌ణ్ కి ఉన్న అనుబంధం అలాంటిది.

కాఫీ విత్ కరణ్ మొదటిసారిగా 19 నవంబర్ 2004న స్టార్ వరల్డ్ లో ప్రసారమైంది.. ప్రదర్శన తన ఆరవ మరియు చివరి సీజన్ ను 17 మార్చి 2019న ముగించింది. అయితే ఇప్పుడు డిస్నీ ప్ల‌స్ హాట్ స్టార్ లో సీజ‌న్ 7 ప్రారంభం అవుతుండ‌డ‌మే పెద్ద ట్విస్టు. ముగిసిపోయింది అనుకుంటుండ‌గానే ఇప్పుడిలా ఓటీటీ డీల్ తో క‌ర‌ణ్ తెలివైన గేమ్ స్టార్ట్ చేసాడు. ఇక బాలీవుడ్ లో వ‌రుసగా భారీ చిత్రాల్ని నిర్మిస్తున్న క‌ర‌ణ్ `లైగ‌ర్` లాంటి పాన్ ఇండియా చిత్రంతో సౌత్ ని కొల్ల‌గొట్టాల‌న్న ప్లాన్ తో ఉన్నాడు.