బుల్లితెరపై పెద్ద హిట్ .. 'కలర్ ఫోటో'

ఏ సినిమాకైనా కావలసింది కథనే. జుట్టు అంటూ ఉంటే ఎన్నిరకాల కొప్పులైనా వేయవచ్చన్నట్టుగా, కథ అంటూ ఉంటే ఎన్ని మలుపులైనా తిప్పొచ్చు .. ప్రేక్షకులను మెప్పించవచ్చు. కథ బాగుంటేనే దానికి హీరో క్రేజ్ తోడవుతుంది .. హీరోయిన్ గ్లామర్ యాడవుతుంది. పాటలు బాగుంటే మరికొన్ని మార్కులు అదనంగా పడతాయి.

మాటలు బాగుంటే మరికొన్ని విజిల్స్ పడతాయి. కథ లేకుండా ముందుకు వెళ్లడమనేది. తెడ్డు లేని పడవ ప్రయాణం వంటిది. కథ లేకుండా చేసే ఖర్చు .. అడవికాచిన వెన్నెల లాంటింది. బలమైన కథ అనేది ఉండాలేగానీ, స్టార్స్ తో పనిలేకుండా ఆదరించడానికి ప్రేక్షకులు ఎప్పుడూ కూడా రెడీగానే ఉంటారు.

అలాంటి సినిమాలకి వెండితెరపైనే కాదు బుల్లితెరపై కూడా విశేషమైన ఆదరణ లభిస్తుందనే విషయాన్ని మరోసారి నిరూపించిన చిత్రంగా 'కలర్ ఫొటో' కనిపిస్తోంది. ఇటీవల 'స్టార్ మా'లో ప్రసారమైన ఈ సినిమాకి బుల్లితెర ప్రేక్షకులు నీరాజనాలు పట్టారు. అత్యధిక రేటింగ్ తో ఈ సినిమా ఆశ్చర్యపరిచింది.

బలమైన కథాకథనాలకు ప్రేక్షకుల నుంచి బలమైన మద్దతు లభిస్తుందనే విషయాన్ని ఈ సినిమా నిరూపించింది. ప్రేక్షకులు తెరపై నడుస్తున్న కథకి కనెక్ట్ అవుతారే తప్ప ఖర్చుకు కాదనే విషయాన్ని స్పష్టం చేసింది.

సుహాస్ - చాందినీ చౌదరి జంటగా నటించిన ఈ సినిమా, క్రితం ఏడాది అక్టోబర్ 23న ప్రేక్షకుల ముందుకు వచ్చింది. ఇది స్టార్ డమ్ లేని ఆర్టిస్టులు చేసిన ప్రేమకథ.

ప్రేమకి కులమతాలు .. ధనిక - పేద తారతమ్యాలు మాత్రమే అడ్డుపడుతూ ఉంటాయని ఇంతవరకూ కొన్ని సినిమాలు చెబుతూ వచ్చాయి. నలుపు - తెలుపు అనే మేని ఛాయ కూడా ప్రేమకి అడ్డుపడుతుందనీ, దానిని కూడా ప్రేమ అధిగమిస్తుందని చెప్పిన చిత్రమే 'కలర్ ఫోటో. సందీప్ రాజ్ దర్శకత్వం వహించిన ఈ సినిమా, యూత్ ను ఎంతగానో ఆకట్టుకుంది.

సహజత్వానికి దగ్గరగా అనిపించే కథాకథనాలు, పాత్రలను తీర్చిదిద్దిన తీరు ఈ సినిమాకి ప్రధానమైన బలంగా నిలిచాయి. కథకి తగిన సన్నివేశాలు .. పాత్రల స్వభావానికి తగిన మాటలు .. సహజత్వానికి దగ్గరగా ఆవిష్కరించిన పాటలు ఈ సినిమాకి హయ్యెస్ట్ రేటింగ్ ను తెచ్చిపెట్టాయి.

స్టార్ మా లో ప్రసారమైన ఈ సినిమాకి 6.27 రేటింగ్ వచ్చింది. ఇతర ఛానల్స్ లో ఆ సమయంలో బలమైన సినిమాలు ఏమీ లేకపోవడం కూడా ఈ సినిమాకి ఈ స్థాయి టీఆర్పీ రావడానికి కారణమైందనే అభిప్రాయాలు కూడా వినిపిస్తున్నాయి.