కళ్యాణ్ రామ్ ప్లేస్‌ లోకి ఆ కుర్రాడు?

అసలే ఇరుకు ఎక్కువైపోతోందని ఫీలైపోతుంటే.. దసరా రేసులోకి ఇంకో కుర్రాడు తయారయ్యాడు. అసలే కెరీర్ అంతంతమాత్రంగా ఉన్న సుమంత్ అశ్విన్.. విపరీతమైన పోటీ ఉన్న దసరా బరిలోకి దిగిపోతున్నాడు. అశ్విన్ కొత్త సినిమా ‘కొలంబస్’ కూడా దసరా రోజున అంటే అక్టోబరు 22నే ప్రేక్షకుల ముందుకొస్తుందట. ఈ రోజు పేపర్ ప్రకటన కూడా ఇచ్చేశారు. ఈ సినిమాకు ఇప్పటిదాకా పెద్దగా పబ్లిసిటీ కూడా చేయలేదు.

టైటిల్ అప్పుడప్పుడూ వినిపిస్తున్నా.. సినిమా గురించి జనాలకు పెద్దగా తెలిసింది లేదు. ఆర్.సామల అనే కొత్త దర్శకుడు రూపొందించిన సినిమా ఇది. నిర్మాత అశ్విన్ కుమార్ కూడా కొత్తవాడే. సుమంత్ అశ్విన్ సరసన నూడుల్స్ భామ సీరత్ కపూర్, చిన్నదాన నీకోసం ఫేమ్ మిస్త్రీ చక్రవర్తి కథానాయికలుగా నటించారు. నిన్ననే విక్టరీ వెంకటేష్ వచ్చి ఈ సినిమా ఆడియో విడుదల చేశాడు.

ఐతే కంచె - షేర్ - రాజుగారి గది... ఈ మూడు సినిమాలు దసరా బరిలో ఉన్నా ‘కొలంబస్’ను అదే రోజు విడుదల చేయాలనుకుంటుండటం పెద్ద సాహసమే అవుతుంది. ఐతే ఈ ఇందులో కళ్యాణ్ రామ్ సినిమా దసరాకు డౌటంటున్నారు. అందుకే కొలంబస్ యూనిట్ కాన్ఫిడెంటుగా డేట్ అనౌన్స్ చేసేసినట్లు చెబుతున్నారు. కంచెతో పోటీ పడితే ప్రేక్షకుల ఫస్ట్ ఛాయిస్ తమ సినిమా కాదన్న ఆలోచనతో.. తర్వాతి వారం టాప్ ఛైర్ తీసుకోవడానికే ‘షేర్’ టీమ్ నిర్ణయించుకున్నట్లు సమాచారం. ఒకవేళ ‘షేర్’ దసరాకే రావడం ఖాయమైతే మాత్రం ‘కొలంబస్’ వెనక్కి వెళ్లే అవకాశముంది.