రౌడీ అల్లుడు+దొంగ మొగుడు=150

తమిళ బ్లాక్ బస్టర్ ‘కత్తి’ చాలా వరకు సీరియస్ గా సాగుతుంది. హీరో పక్కన ఉండే ఫ్రెండు అప్పుడప్పుడూ కొన్ని చమక్కులు వదులుతుంటాడు కానీ.. అంతకుమించి కామెడీ ట్రాక్స్ ఏమీ ఉండవు. ఐతే తెలుగు రీమేక్ ‘ఖైదీ నెంబర్ 150’ మాత్రం ఒరిజినల్ తో పోలిస్తే భిన్నంగా ఉంటుందట. ఇది చాలా ఎంటర్టైనింగ్ గా సాగుతుందట. తెలుగు వెర్షన్ కోసం స్టార్ కమెడియన్లు బ్రహ్మానందం.. పృథ్వీలతో ప్రత్యేకంగా కామెడీ ట్రాక్స్ చేయించాడు దర్శకుడు వినాయక్. ఇందులో పృథ్వీ ట్రాక్ లో చాలా వరకు కోత పడ్డప్పటికీ ఎంటర్టైన్మెంట్ ఏమీ తగ్గదట.

వినాయక్ మాటల్లో చెప్పాలంటే.. చిరంజీవి సూపర్ హిట్ ఎంటర్టైనర్స్ రౌడీ అల్లుడు.. దొంగమొగుడు సినిమాలు రెంటినీ కలిపితే ఎంత ఎంటర్టైన్మెంట్ ఉంటుందో అంతా ‘ఖైదీ నెంబర్ 150’లో ఉంటుందట. బ్రహ్మానందం.. చిరు కాంబినేషన్లో వచ్చే సన్నివేశాలు భలేగా పేలుతాయని వినాయక్ చెప్పాడు. బ్రహ్మానందాన్ని చిరంజీవి ఆటపట్టించే సన్నివేశాల్లో కామెడీ చాలా బాగా పండిందన్నాడు వినాయక్.

‘ఖైదీ నెంబర్ 150’ స్క్రిప్టు ఓకే అయ్యాక బ్రహ్మానందం ఈ సినిమాలో ఉండాలని చిరంజీవి అడిగి మరీ ఆయనతో తన కాంబినేషన్లో వచ్చే సన్నివేశాల కోసం ఒక ట్రాక్ రాయించుకున్నారని.. ఎలాగోలా కష్టపడి బ్రహ్మి పాత్రను సినిమాలో ఇరికించేశామని వినాయక్ తెలిపాడు. ‘ఖైదీ నెంబర్ 150’ అన్ని వర్గాల ప్రేక్షకుల్నీ మెప్పించేలా తయారయిందని.. ఇందులో కామెడీ.. సెంటిమెంటు.. యాక్షన్ అన్నీ సమపాళ్లలో కుదిరాయని వినాయక్ తెలిపాడు. చిరంజీవి అభిమానులు పండగ చేసుకునేలా ఆయన అన్ని రకాలుగానూ ఎంటర్టైన్ చేస్తాడని అన్నాడు.

Like Us on Facebook : https://www.facebook.com/Tupakidotcom/