మంచు విష్ణు వివాదాస్పద వ్యాఖ్యలు చేశారా?

ఓవైపు తన సినిమా రిలీజ్ హడావుడిలో ఉన్న మంచు విష్ణు వివాదాస్పద వ్యాఖ్యలు చేశారా? అంటే అవుననే మాట వినిపిస్తోంది. దీనికి సంబంధించిన ఆధారాలు సరిగా లభించనప్పటికీ.. తాజాగా హైదరాబాద్ లోని నేరేడ్ మెంట్ కు చెందిన ఆర్ మణిరత్నం అనే వ్యక్తి పోలీసులకు ఒక ఫిర్యాదు చేశారు. ఈ ఫిర్యాదులో సినీ హీరో మంచు విష్ణు వివాదాస్పద వ్యాఖ్యలు చేసినట్లుగా పేర్కొన్నారు.

ప్రత్యేక హోదా కోసం విశాఖలో నిర్వహించనున్న మౌనదీక్ష నేపథ్యంలో ఆయన స్పందిస్తూ.. కొన్ని వివాదాస్పద వ్యాఖ్యలు చేసినట్లుగా పేర్కొన్నారు. ఫిర్యాదులో పేర్కొన్న విషయాన్ని చూస్తే.. ‘‘జల్లికట్టు పోరాటం స్ఫూర్తిగా తీసుకొని ప్రత్యేక హోదా కోసం పోరాడాలి. దక్షిణాది ప్రజలు నిర్ణయిస్తేనే ఢిల్లీలో ప్రభుత్వాలు ఏర్పడుతున్నాయి. కానీ.. మనకు ఉత్తరాది నుంచి సరైన గుర్తింపు రావట్లేదు. అలాంటప్పుడు కలిసి ఉండే ఏం లాభం? దక్షిణాది.. ఉత్తరాది ప్రాంతాలను వేర్వేరు దేశాలుగా విడగొట్టేస్తే బాగుంటుంది కదా?’’ అంటూ దేశ సమగ్రతకు భంగం వాటిల్లేలా వ్యాఖ్యలు చేసినట్లుగా పేర్కొన్నారు. ఈ ఫిర్యాదును స్వీకరించిన పోలీసులు విచారిస్తున్నట్లు చెబుతున్నారు. చూస్తుంటే.. పవన్ చెప్పే ఉత్తరాది.. దక్షిణాది వ్యాఖ్యలు విష్ణు మీద ప్రభావం చూపించాయా.. ఏంటి?

Like Us on Facebook : https://www.facebook.com/Tupakidotcom/