సర్కారు వారి షూట్ లో మహేష్ ని కలిసిన కాంగ్రెస్ ఎంపీ శశి థరూర్..!

సూపర్ స్టార్ మహేష్ బాబు ప్రస్తుతం నటిస్తున్న 'సర్కారు వారి పాట' చిత్ర షూటింగ్ శరవేగంగా జరుగుతోంది. హైదరాబాద్ లోని ఓ హోటల్ లో యాక్షన్ సన్నివేశాలను చిత్రీకరిస్తున్నారు దర్శకుడు పరశురామ్ పెట్లా. అయితే బుధవారం మహేష్ విలన్లతో ఫైట్ చేస్తున్న సమయంలో సర్కారు వారి షూటింగ్ స్పాట్ లో అనుకోని అతిథిగా కాంగ్రెస్ పార్టీ జాతీయ నేత, ఎంపీ శశి థరూర్ ప్రత్యక్షమయ్యారు.

ఓ కార్యక్రమంలో పాల్గొనడం కోసం ప్రస్తుతం హైదరాబాద్ లో ఉన్న తిరువనంతపురం ఎంపీ శశి థరూర్.. తెలుగుదేశం ఎంపీ, మహేష్ బావ గల్లా జయదేవ్ తో కలసి 'సర్కారు వారి పాట' లొకేషన్ లో మహేష్ బాబును మీట్ అయ్యారు. ఈ విషయాన్ని శశి థరూర్ సోషల్ మీడియా వేదికగా వెల్లడించారు. ఈ సందర్భంగా మహేష్ తో కలిసి ఉన్న ఫోటోలను షేర్ చేశారు. మహేష్ - శశిథరూర్ మధ్య సరదా సంభాషణ జరిగినట్లు ఆయన షేర్ చేసిన వీడియోని బట్టి అర్థం అవుతుంది.

''సూపర్ స్టార్ మహేష్ బాబుని హైదరాబాద్ లోని హోటల్ లో కలిశాను. నాతో పాటుగా నా సహోద్యోగి (& అతని బావ) జయదేవ్ గల్లా కూడా ఉన్నారు. మహేష్ ది ఎంతో మనోహరమైన వ్యక్తిత్వం'' అని శశిథరూర్ ట్వీట్ చేశారు. మరో ట్వీట్ లో ''మహేష్‌ బాబుతో మాట్లాడితే గౌరవప్రదమైన "సూపర్‌ స్టార్" ట్యాగ్ లేకుండా హైదరాబాద్‌ లో ఎవరూ ఆయనను ఎందుకు పిలవరో మీకు తెలుస్తుంది. మేము తెరవెనుక మాట్లాడుకున్న తర్వాత అతను తన సినిమాలో విలన్‌ ను పడగొట్టడం పూర్తి చేశాడు'' అని థరూర్ పేర్కొన్నారు.

కాంగ్రెస్ పార్టీ సీనియర్ నేత షేర్ చేసిన ఫొటోలు వీడియోలలో మహేష్ బాబు మాస్ లుక్ ఫ్యాన్స్ ని విపరీతంగా ఆకట్టుకుంటోంది. చెవి పోగుతో ట్రెండీ కాస్ట్యూమ్స్ ధరించి వింటేజ్ మహేష్ ను గుర్తు చేస్తున్నారు. కాగా, 'సర్కారు వారి పాట' చిత్రాన్ని 2022 సంక్రాంతి కానుకగా జనవరి 13న విడుదల చేయనున్నారు. ఇందులో మహేష్ సరసన కీర్తి సురేష్ హీరోయిన్ గా నటిస్తోంది. ఇటీవల విడుదలైన బ్లాస్టర్ టీజర్ విశేష స్పందన తెచ్చుకొని, సరికొత్త రికార్డులు నమోదు చేసింది. బాక్సాఫీస్ వద్ద ఈ సినిమా ఎలాంటి రికార్డులు క్రియేట్ చేస్తుందో చూడాలి.