సెన్సారైపోయింది.. రిలీజ్ డేట్ కన్ఫమ్

ఓ సినిమా అనుకున్న తేదీకి రిలీజైతే ఆశ్చర్యపోవాల్సిన పరిస్థితి ఉంది టాలీవుడ్ లో ప్రస్తుతం. ఈ ఏడాది ఎన్ని సినిమాలు వాయిదా పడి ఆలస్యంగా రిలీజయ్యాయో లెక్కేలేదు. దాదాపుగా ప్రతి పెద్ద సినిమా కూడా వాయిదా పడుతూనే వచ్చింది. ఇప్పుడు కూడా ఆ పరంపర కొనసాగుతూనే ఉంది. రుద్రమదేవి రిలీజ్ డేట్ గురించి ఎంత సందిగ్ధత ఉందో కొత్తగా చెప్పాల్సిన పని లేదు. నితిన్ సినిమా ‘కొరియర్ బాయ్ కళ్యాణ్’ పరిస్థితి కూడా ఇలాగే ఉంది. రెండేళ్లు వాయిదా పడి.. ఎట్టకేలకు సెప్టెంబరు 11న విడుదలకు సిద్ధమైన ‘కొరియర్ బాయ్’ కళ్యాణ్.. ఏవో కారణాలతో వాయిదా పడిపోయింది.

ఐతే ఈ సినిమా మరీ ఆలస్యమేమీ కావట్లేదు. తర్వాతి వారానికి రిలీజైపోతోంది. సెన్సార్ సమస్యల వల్లే విడుదల వాయిదా అన్నారు. ఇప్పుడా సెన్సార్ కూడా అయిపోయింది. బుధవారం చడీచప్పుడు లేకుండా ఈ సినిమా సెన్సార్ పూర్తి చేశారు. సినిమాకు ఎలాంటి కట్స్ లేకుండా ‘యు/ఎ’ సర్టిఫికెట్ ఇచ్చేసింది సెన్సార్ బోర్డు. ఇక విడుదలకు అన్ని రకాల ఇబ్బందులూ తొలగిపోయినట్లే. వినాయక చవితి కానుకగా ఈ నెల 17న ‘కొరియర్ బాయ్ కళ్యాణ్’ రిలీజ్ చెయ్యడానికి ప్లాన్ చేస్తున్నారు.

పనీ పాటా లేకుండా ఖాళీగా తిరిగే సాధారణ యువకుడి లైఫ్ లో ఒక అసాధారణ సంఘటన జరిగితే అతని లైఫ్ ఎలా మారిపోయింది, తను మళ్లీ మామూలు జీవితం సాగించడానికి ఏం చేయాల్సి వచ్చింది అనే కథాంశంతో ఈ సినిమా తెరకెక్కింది. నితిన్ ఇందులో కొరియర్ బాయ్ గా నటించాడు. అతడి చేతికి వచ్చిన ఓ కొరియర్ చుట్టూ కథ సాగుతుంది. ప్రేమ్ సాయి దర్శకుడిగా పరిచయమవుతున్న ఈ సినిమాను ప్రముఖ దర్శకుడు గౌతమ్ మీనన్ నిర్మించాడు. యామి గౌతమ్ కథానాయిక. కార్తీక్, అనూప్ రూబెన్స్ సంగీత దర్శకులు.