ఆ క్రేజీ మూవీలన్ని ‘ఆహా’ సొంతం.. తాజాగా ఓకే చేసిన మూవీలివే!

వెండి తెర.. వెండి తెరే. బుల్లితెర బుల్లితెరే అన్నట్లు ఉండేది. ఈ రెండింటి మధ్య దూరం రెండు పట్టాల మధ్యనున్నంతగా ఉండేది. మాయదారి మహమ్మారి పుణ్యమా అని.. లాక్ డౌన్ విధించేయటం.. నెలల తరబడి థియేటర్లు మూసేయటంతో.. ఓటీటీ ఫ్లాట్ ఫాం మీద ప్రేక్షకుడి కన్ను పడింది. కరోనాకు ముందే ఇలాంటివి ఉన్నా.. తొలి లాక్ డౌన్ వేళ.. వీటితో బాగా ఎంగేజ్ కావటమే కాదు.. వివిధ భాషా చిత్రాలకు ఇట్టే కనెక్టు అయ్యారు ప్రేక్షకులు. ఇలాంటి వేళ.. కొన్ని కొత్త సినిమాల్ని ఓటీటీలో విడుదల చేయటం షురూ అయ్యింది. ఇలాంటివేళ.. మొదలైన అల్లు అరవింద్.. మైహోం రామేశ్వరరావు వారి 'ఆహా' అనతి కాలంలోనే ప్రేక్షకులకు దగ్గరైంది.

మొదట్లో 'ఆహా' ప్రయాణం అంతంతమాత్రంగానే ఉండేది. నెట్ ఫ్లిక్స్.. అమెజాన్ లాంటో తోపు ఓటీటీలతో ఏం పోటీ పడగలదన్నట్లుగా ఉండేది. కానీ.. స్వల్ప వ్యవధిలోనే తనదైన కంటెంట్ తో ప్రేక్షకుల ముందుకు రావటం..కొత్త సినిమాల డిజిటల్ స్ట్రీమింగ్ ను సొంతం చేసుకుంటూ దూసుకెళుతోంది. ఆ క్రమంలో తాజాగా మూడు సినిమాలతో ఆహా డిజిటల్ స్ట్రీమింగ్ కు ఒప్పందం చేసుకుంది. అయితే.. ఈ మూడు సినిమాలు మోస్ట్ అవేటింగ్ వే కావటం విశేషం.

ఇప్పుడున్న పోటీలో క్రేజీ సినిమాలను సొంతం చేసుకోవటానికి విపరీతంగా ప్రయత్నిస్తున్నాయి. కొన్ని సినిమాలకు ఫ్యాన్సీ అమౌంట్లు ఇచ్చి ఓకే చేసుకుంటున్నాయి ఓటీటీ ఫ్లాట్ ఫాంలు. అలాంటివేళ.. ఒకే సమయంలో మూడు క్రేజీ సినిమాల్ని తన ఖాతాలో వేసుకోవటంలో ఆహా సక్సెస్ అయ్యింది.ఇంతకీ ఆ మూడు మూవీస్ ఏమంటే..

శేఖరకమ్మల దర్శకత్వం వహించిన లవ్ స్టోరీ మీద ఉన్న అంచనాలు అన్ని ఇన్ని కావు. నాగచైతన్య.. సాయిపల్లవి జంటగా నటించిన ఈ మూవీలోని సారంగదరియా పాట ఎంతలా ఫేమస్ అయ్యిందో తెలిసిందే. ఈ పాటకు వచ్చిన రెస్పాన్స్ సినిమా మీద అంచనాల్ని భారీగా పెంచేసింది. ఈ సినిమా డిజిటల్ స్ట్రీమింగ్ హక్కుల్ని ఆహా సొంతం చేసుకుంది. దీంతో పాటు.. ఒక్క పోస్టర్ తో సినిమా మీద విపరీతమైన అంచనాలు పెంచేసిన మూవీ.. 'మోస్ట్ ఎలిజిబుల్ బ్యాచ్ లర్'. అక్కినేని అఖిల్.. పూజాహెగ్డే జంటగా నటించిన ఈ సినిమా కోసం యూత్ ఎంతో ఆసక్తిగా చూస్తోంది.

ఈ సినిమాకు సంబంధించిన డిజిటల్ స్ట్రీమింగ్ హక్కుల్ని సొంతం చేసుకుంది. తన ఇమేజ్ కు భిన్నమైన పాత్రతో.. గెటప్ తో ఇప్పటికే అంచనాలు పెంచేసిన నాగశౌర్య చిత్రం 'లక్ష్య'. ఫుల్ యాక్షన్ ప్యాక్ గా భావిస్తున్న ఈ మూవీని ఆహా డిజిటల్ స్ట్రీమింగ్ కు వీలుగా ఒప్పందం చేసుకుంది. అమలాపాల్ కీలకభూమిక పోషించిన 'కుడి ఎడమైతే' మూవీని సైతం 'ఆహా' జాబితాలో చేరిపోయింది. ఇలా పలు క్రేజీ మూవీస్ తో ఒప్పందాలు చేసుకోవటంతో దూసుకెళుతున్న ఆహా దెబ్బకు.. అమెజాన్.. నెట్ ఫ్లిక్స్ తదితర ఓటీటీ ఫ్లాట్ ఫాంలు ఉక్కిరిబిక్కిరి అవుతున్నాయని చెప్పక తప్పదు.

కొత్త సినిమాల సంగతి పక్కన పెడితే ఆహా నిన్న ఒక్కరోజు 15 క్లాసిక్ మూవీస్ ని రిలీజ్ చేసి సంచలనం సృష్టించింది

ఇంతకూ ఆ 15 మూవీలు ఏవంటే..
1. యుద్ధం శరణం
2. అందాల రాక్షసి
3. దిక్కులు చూడకు రామయ్య
4. ఊహలు గుసగుసలాడే
5. ఈగ
6. బంగారు బుల్లోడు
7. భైరవ ద్వీపం
8. చిరునవ్వుతో
9. ఘటోత్కచుడు
10. కొబ్బరి బొండం
11. రాజేంద్రుడు గజేంద్రుడు
12. వినోదం
13. వేటగాడు
14. లీసా
15. పొగరు