వకీల్ సాబ్ ఓటిటి రిలీజ్ పై క్రేజీ న్యూస్!

టాలీవుడ్ పవర్ స్టార్ పవన్ కళ్యాణ్ కంబ్యాక్ మూవీ వకీల్ సాబ్. భారీ అంచనాలతో ఏప్రిల్ 9న విడుదలైన వకీల్ సాబ్ మూవీ బ్లాక్ బస్టర్ హిట్ అందుకొని భారీస్థాయిలో కలెక్షన్స్ రాబట్టింది. భారీ విరామం తర్వాత పవన్ కళ్యాణ్ స్క్రీన్ పై కనిపించడంతో తెలుగు రాష్ట్రాలలో అభిమానులు వకీల్ సాబ్ సినిమాను ఓ రేంజిలో మోసారు. అయితే విడుదలైన కొద్దిరోజుల నుండే వకీల్ సాబ్ వార్తల్లో నిలుస్తుంది. ఏంటంటే.. మాములుగా థియేట్రికల్ రిలీజ్ అయ్యాక సినిమాలను కనీసం 56రోజుల తర్వాతే ఓటిటిలో రిలీజ్ చేస్తారు. కానీ వకీల్ సాబ్ విషయంలో ఓటిటి వార్తలు కాస్త ముందుగానే వినిపిస్తున్నాయి. ఇప్పటికే వకీల్ సాబ్ మూవీ ఖచ్చితంగా 56 తర్వాతే వస్తుందని నిర్మాత దిల్ రాజు తెలిపాడు.

కానీ తాజా సమాచారం ప్రకారం.. వకీల్ సాబ్ దిల్ రాజు చెప్పిన దానికంటే ముందే ఓటిటి రిలీజ్ కాబోతుందని టాక్. ప్రముఖ డిజిటల్ ప్లాట్ ఫామ్ అమెజాన్ ప్రైమ్ వారు వకీల్ సాబ్ డిజిటల్ హక్కులు సొంతం చేసుకున్న విషయం తెలిసిందే. అమెజాన్ వారు వకీల్ సాబ్ మూవీకి భారీగానే చెల్లించారట. ఇదిలా ఉండగా.. ప్రస్తుతం కరోనా సెకండ్ వేవ్ నేపథ్యంలో సినిమా థియేటర్స్ మూతపడే పరిస్థితి నెలకొంది. ఇలాంటి సమయంలో వకీల్ సాబ్ మూవీని త్వరగా డిజిటల్ రిలీజ్ చేసే దిశగా అమెజాన్ వారు దిల్ రాజుతో చర్చిస్తున్నట్లు తెలుస్తుంది. మరి చర్చలు ముగిసాక వకీల్ సాబ్ ఓటిటి రిలీజ్ ఎప్పుడనేది తెలియనుంది. ఈ రెండుమూడు రోజుల్లో మేకర్స్ నుండి క్లారిటీ వచ్చే అవకాశం ఉంది. ఈ సినిమాకు వేణుశ్రీరామ్ దర్శకత్వం వహించగా.. అంజలి, నివేదాథామస్, అనన్య కీలకపాత్రలు పోషించారు. తమన్ సంగీతం అందించాడు.