తారక్ - త్రివిక్రమ్ సినిమాకు సంబంధించిన క్రేజీ రూమర్స్..!

యంగ్ టైగర్ ఎన్టీఆర్ - డైరెక్టర్ త్రివిక్రమ్ శ్రీనివాస్ కాంబినేషన్ లో ఓ మూవీ తెరకెక్కనున్న సంగతి తెలిసిందే. హారిక అండ్ హాసిని క్రియేష‌న్స్‌ మరియు ఎన్టీఆర్ ఆర్ట్స్ బ్యాన‌ర్స్‌ పై రాధాక‌ష్ణ‌ (చినబాబు) - నంద‌మూరి క‌ల్యాణ్‌ రామ్ సంయుక్తంగా ఈ చిత్రాన్ని నిర్మించనున్నారు. 'అయినను పోయిరావలె హస్తినకు' అనే టైటిల్ పరిశీలనలో ఉన్న ఈ చిత్రానికి సంబంధించి ఆసక్తికరమైన న్యూస్ సోషల్ మీడియాలో సర్క్యులేట్ అవుతోంది. అదేంటంటే త్రివిక్రమ్ ఈ సినిమాని ముందు అనుకున్న స్టోరీ ప్రకారం కాకుండా.. అందులో పలు మార్పులు చేర్పులు చేస్తున్నాడట.

ప్రస్తుతం టాలీవుడ్ లో అగ్ర దర్శకుల్లో ఒకరిగా ఉన్న త్రివిక్రమ్ పై ఓ అపవాదు ఉంది. ఓల్డ్ మూవీస్ స్టోరీస్ ని, సన్నివేశాలను కాపీ కొట్టి.. తనదైన శైలి కథనం సంభాషణలతో సినిమాగా చేస్తుంటాడని అతన్ని విమర్శిస్తుంటారు. ఈ మధ్య త్రివిక్రమ్ తీసిన అన్ని సినిమాల మీద ఇలాంటి కామెంట్స్ వచ్చాయి. అందుకే ఈసారి ఎన్టీఆర్ తో చేయబోయే సినిమాలో అలాంటి నెగిటివ్ కామెంట్ ఒక్కటి కూడా రాకుండా స్క్రిప్ట్ దశలోనే జాగ్రత్తలు తీసుకుంటున్నాడాట. ఈ నేపథ్యంలోనే కథలో కొన్ని చేంజెస్ చేసాడని అంటున్నారు. ఇది పొలిటికల్ బ్యాక్ డ్రాప్ లో ఉండే ఎంటర్టైనర్ అని టాక్. ప్రస్తుతం 'అయ్యప్పనుమ్ కొశీయుమ్' పనుల్లో బిజీగా ఉన్న త్రివిక్రమ్.. త్వరలోనే తారక్ సినిమాని సెట్స్ పైకి తీసుకెళ్లనున్నాడు.

ఇకపోతే తారక్ - త్రివిక్రమ్ కాంబోలో వచ్చే సినిమాలో సీనియర్ నటి అర్చన నటించబోతున్నారని వార్తలు వస్తున్నాయి. 'నిరీక్షణ' 'లేడీస్ టైలర్' 'దాసి' వంటి చిత్రాలతో తెలుగు ప్రేక్షకులను మెప్పించిన అర్చన.. రెండు సార్లు జాతీయ ఉత్తమ నటి పురస్కారాన్ని అందుకుంది. అయితే చాలా ఏళ్ళ క్రితమే సినిమాలకు దూరమైన అర్చన.. ఇప్పుడు మళ్లీ సినిమాల్లో నటిస్తోంది. ఈ క్రమంలోనే 'ఎన్టీఆర్30' చిత్రంలో హీరో తల్లి పాత్ర పోషించనుందని అంటున్నారు. ఈ వార్తల్లో నిజమెంతో తెలియాలంటే అధికారిక ప్రకటన వచ్చే వరకు ఆగాల్సిందే.