'రాధే శ్యామ్' టీజర్ పై క్రేజీ అప్డేట్..!

యంగ్ రెబల్ స్టార్ ప్రభాస్ నటిస్తున్న పీరియాడికల్ లవ్ స్టోరీ ''రాధే శ్యామ్'' అప్డేట్ కోసం డార్లింగ్ ఫ్యాన్స్ ఆతృతగా ఎదురుచూస్తున్నారు. రాధాకృష్ణ కుమార్ దర్శకత్వంలో తెరకెక్కుతున్న ఈ చిత్రం నుంచి ఇప్పటి వరకు ఓ మోషన్ పోస్టర్ ని మాత్రమే రిలీజ్ చేశారు. ఇక న్యూ ఇయర్ లేదా సంక్రాంతి కానుకగా టీజర్ ని విడుదల చేస్తారని భావించిన ఫ్యాన్స్‌ కి నిరాశే ఎదురైంది. దీంతో అతి త్వరలో టీజర్ అప్డేట్ వస్తుందని డైరెక్టర్ రాధాకృష్ణ కుమార్ ట్వీట్ చేసి వారికి నచ్చజెప్పే ప్రయత్నం చేశాడు. ఈ నేపథ్యంలో ప్రేమికుల రోజు సందర్భంగా 'రాధే శ్యామ్' టీజర్ ని విడుదల చేయడానికి సన్నాహాలు జరుగుతున్నాయని సమాచారం.

'రాధే శ్యామ్' నుంచి 1నిమిషం 30 సెకండ్ల నిడివితో టీజర్ ని కట్ చేసారట. ఇప్పటి వరకు వదిలిన ప్రచార చిత్రాల్లో రొమాంటిక్ యాంగిల్ చూపించగా.. టీజర్ లో యాక్షన్ ని కూడా చూపించబోతున్నారట. అలానే ఈ మధ్య క్రేజీ ప్రాజెక్ట్స్ అన్నీ రిలీజ్ డేట్స్ ఇస్తుండటంతో 'రాధే శ్యామ్' అనౌన్స్ మెంట్ కూడా ఇచ్చే ఛాన్స్ ఉందని టాక్. ఏదేమైనా ఈ టీజర్ కోసం ప్రభాస్ ఫ్యాన్స్ ఆతృతగా ఎదురు చూస్తున్నారని చెప్పవచ్చు. పాన్ ఇండియా లెవల్లో రూపొందుతున్న ఈ చిత్రాన్ని కృష్ణంరాజు సమర్పణలో గోపీకృష్ణా మూవీస్‌ మరియు యూవీ క్రియేషన్స్‌ బ్యానర్స్ పై వంశీ - ప్రమోద్‌ - ప్రశీద 'రాధే శ్యామ్' సినిమాను నిర్మిస్తున్నారు. ఇందులో ప్రభాస్ కి జోడీగా పూజా హెగ్డే నటించింది.