అందరికీ కావాలి.. ఎవరికి చిక్కేనో?

ఇవాళ ఒక్కరోజే మూడు సినిమాలు రిలీజ్ అవుతున్నాయి. మంచు మనోజ్ నటించిన ఒక్కడు మిగిలాడు.. సందీప్ కిషన్ హీరోగా రూపొందిన కేరాఫ్ సూర్య.. విశాల్ నటించిన డిటెక్టివ్ చిత్రాలు విడుదల అవుతున్నాయి. ఈ అన్నిటికీ తమిళ్ లింక్ ఉండడం విశేషం. ఒక్కడు మిగిలాడు.. కేరాఫ్ సూర్య చిత్రాలు తెలుగు-తమిల్ రెండు భాషల్లోనూ రూపొందిన చిత్రాలు కాగా.. తుప్పరివాలన్ కు డబ్బింగ్ వెర్షన్ గా డిటెక్టివ్ వస్తోంది.

మరోవైపు ఈ సినిమాల్లో నటించిన హీరోలు అందరికీ ఇప్పుడు సక్సెస్ చాలా అవసరం. మంచు మనోజ్ సక్సెస్ టేస్ట్ చేసి చాలా కాలమే అయింది. ఒక్కడు మిగిలాడులో రెండు విభిన్న పాత్రల కోసం చాలానే కష్టపడ్డాడు మంచు మనోజ్. టీజర్.. ట్రైలర్ లు కూడా ఆసక్తి కలిగించడంతో ఈ మూవీపై మంచి అంచనాలే ఏర్పడ్డాయి. మరోవైపు సందీప్ కిషన్ పరిస్థితి కూడా ఏమంత గొప్పగా లేదు. ఈ హీరో ప్రధాన పాత్రలో రీసెంట్ గా వచ్చిన నక్షత్రం మూవీ భారీ డిజాస్టర్ అయింది. తమిళ్ సినిమాల్లోకి వెళ్లిపోతున్నాడనే స్టాంప్ కూడా పడుతోంది. ఇలాంటి సమయంలో మళ్లీ తెలుగులో కుదురుకునేందుకు కేరాఫ్ సూర్య ఉపయోగపడుతుందని సందీప్ నమ్మకంగా ఉన్నాడు.

ఇక పందెంకోడితో తెలుగులో బోలెడంత మార్కెట్ క్రియేట్ చేసుకున్న విశాల్.. రీసెంట్ టైంలో టాలీవుడ్ మార్కెట్ పోగొట్టుకున్నాడు. ఇప్పుడు డిటెక్టివ్ మూవీపై తెలుగులో అంచనాలు తక్కువగానే ఉన్నాయి. కానీ ఈ చిత్రం తమిళంలో మంచి హిట్ సాధించడంతో.. తెలుగులో మళ్లీ తన మార్కెట్ తిరిగి సంపాదించుకునేందుకు డిటెక్టివ్ హెల్ప్ అవుతుందని ఆశలు పెట్టుకున్నాడు విశాల్. లెటజ్ సీ.. ఏమవుతుందో.