కస్టడీ ట్రైలర్: విలన్ ను కాపాడే వేటలో శివ!

అక్కినేని నాగచైతన్య, గార్జియస్ బ్యూటీ కృతి శెట్టి హీరోహీరోయిన్లుగా తమిళ దర్శకుడు వెంకట్ ప్రభు తెరకెక్కించిన బైలింగువల్ మూవీ కస్టడీ. ఈ చిత్రం ట్రైలర్ తాజాగా విడుదల చేసింది మూవీ టీం. ఇప్పటికే విడుదలైన పోస్టర్, ఫస్ట్ లుక్, టీజర్స్ సినీ అభిమానులను విశేషంగా ఆకట్టుకున్నాయి.

తాజాగా రిలీజ్ అయిన కస్టడీ మూవీ ట్రైలర్ లో నాగచైతన్య నటన అక్కినేని అభిమానులను అలరిస్తోంది. ట్రైలర్ తో సినిమా కథ మరియు నేపథ్యం గురించి మరింత క్లారిటీ వచ్చింది. 48 గంటల్లో జరిగే కథాంశంతో ఈ సినిమా తెరకెక్కింది.

సీఎం సెక్యూరిటీగా వెళ్లిన కానిస్టేబుల్ ఏకంగా ఆ ముఖ్యమంత్రినే ఆపడం నుండి సినిమా మలుపు తిరగడం మొదలవుతుంది. ఇందులో ఒకప్పటి టాలీవుడ్ టాప్ హీరోయిన్ ప్రియమణి సీఎం పాత్రలో కనిపిస్తోంది. కేవలం 48 గంటల్లో ఒక విలన్ కు, పోలీసు డిపార్ట్‌మెంట్‌ కు మధ్య ఆ విలన్ చావకుండా కాపాడటమే ఈ మూవీ నేపథ్యం. ట్రైలర్ ద్వారా మూవీ ఇంటెన్సిటీ అర్థమవుతోంది.

విలన్ కు వచ్చే ఆపదలను అడ్డుకుంటూ రక్షించడమే హీరో మిషన్ గా కథ సాగుతుంది. కథ లో విభిన్నమైన పాయింట్ ఇదే. ఇప్పటి వరకు తెలుగు లో నిజంగా ఇలాంటి పాయింట్ తో సినిమా రాలేదు. సినిమా లో ఆసక్తికర విషయాన్ని చిత్ర యూనిట్ ట్రైలర్ ద్వారా చెప్పుకొచ్చింది.

యువన్ శంకర్ రాజా అందించిన సంగీతం విశేషంగా ఆకట్టుకుంటోంది. ఈ సినిమా మే 12వ తేదీన తెలుగు, తమిళ భాషల్లో విడుదల కానుంది. ఇప్పటికే విడుదలైన టీజర్లు, సింగిల్స్ ఆకట్టుకోగా.. తాజాగా రిలీజ్ చేసిన కస్టడీ ట్రైలర్ సినిమాపై మరింత అంచనాలను పెంచింది. మే 12వ తేదీన విడుదల కానున్న కస్టడీ చిత్రం ఏమేరకు ఆకట్టుకోనుందో చూడాలి. వెన్నెల కిషోర్, శరత్ కుమార్, ప్రేమ్ గీ అమరేన్, సంపత్ రాజ్, ప్రియమణి కీలక పాత్రలు పోషిస్తున్నారు. ఈ చిత్రాన్ని శ్రీనివాసా సిల్వర్ స్క్రీన్ బ్యానర్ పై శ్రీనివాసా చిట్టూరి నిర్మిస్తున్నారు.