హెల్మెట్ లేదా పుష్పా..?

ప్రజాహితార్థం సైబరాబాద్ ట్రాఫిక్ పోలీసులు సోషల్ మీడియాలో విన్నూతమైన రీతిలో పోస్టులు పెడుతున్న సంగతి తెలిసిందే. ప్రజలకు ఎప్పటికప్పుడు వివిధ కొత్త పద్ధతుల్లో రోడ్డు ప్రమాదాలు మరియు ట్రాఫిక్ రూల్స్ గురించి అవగాహన కల్పిస్తున్నారు. ప్రస్తుతం ఇంటర్నెట్ వినియోగం పెరిగిన నేపథ్యంలో ఫన్నీ మీమ్స్ ద్వారా ప్రకటనలు ఇస్తూ జాగ్రత్తలు తెలియజేస్తున్నారు.

ఈ క్రమంలో లేటెస్ట్ సినిమాలకు సంబంధించిన పోస్టర్స్ ని కూడా ఉపయోగిస్తూ అందరి దృష్టిని ఆకర్షిస్తున్నారు. బైక్ మీద ఇద్దరి కంటే ఎక్కువ మంది ప్రయాణించరాదని.. ఇద్దరూ తప్పకుండా హెల్మెట్ ధరించాలని మీమ్స్ రూపంలో చెబుతున్నారు. జాగ్రత్తగా ఉండకపోతే జరిగే ప్రమాదాలను.. రూల్స్ పాటించకపోతే తీసుకోబడే చర్యలను వివరిస్తున్నారు.

తాజాగా 'పుష్ప' సినిమా పోస్టర్ ద్వారా ట్రాఫిక్ రూల్స్ పై అవగాహన కల్పించాలని సైబరాబాద్ ట్రాఫిక్ పోలీసులు సంకల్పించారు. అల్లు అర్జున్ బైక్ పై హుందాగా కూర్చున్న ఓ ఫోటోకు.. సినిమాలో బాగా ఫేమస్ అయిన డైలాగ్ తో కలిసి మీమ్ క్రియేట్ చేశారు. అందులో 'పార్టీ లేదా పుష్పా' అని ఫాహాద్ ఫాజిల్ చెప్పే డైలాగుని మార్చి.. 'హెల్మెట్ - మిర్రర్స్ లేవా పుష్ప?' అంటూ మీమ్ రూపంలో ట్వీట్ చేశారు.

''హెల్మెట్ ధరించండి & రేర్ వ్యూ మిర్రర్‌ లను ఫిక్స్ చేయండి. సురక్షితముగా ఉండండి'' అని పోలీసులు ట్వీట్ లో పేర్కొన్నారు. ఇది ఇప్పుడు సోషల్ మీడియాలో వైరల్ అవుతోంది. కాగా, ప్రస్తుతం ఎక్కడ చూసినా 'పుష్ప' మేనియా నడుస్తోంది. శుక్రవారం వరల్డ్ వైడ్ గా భారీ స్థాయిలో విడుదలైన ఈ సినిమా హ్యాష్ ట్యాగ్స్.. ప్రస్తుతం ట్విట్టర్ లో ట్రెండింగ్ లో ఉన్నాయి.

అందుకే ఇప్పుడు సైబరాబాద్ ట్రాఫిక్ పోలీసులు తమదైన రీతిలో పుష్ప - పుష్పరాజ్ ను వాడుకొని ప్రజలకు అవగాహన కల్పిస్తున్నారు. వినూత్న రీతిలో రోడ్డు ప్రమాదాలపై ఎప్పటికప్పుడు ప్రజల్ని అప్రమత్తం చేస్తున్న ట్రాఫిక్ పోలీసులను అందరూ నెటిజన్లు అభినందిస్తున్నారు.