వైరల్ పోస్ట్: బస్తీ బాలరాజుకు 'మంచి కబురు' చెప్పిన సైబరాబాద్ ట్రాఫిక్ పోలీస్..!

సైబరాబాద్ ట్రాఫిక్ పోలీసులు ఈ మధ్య సోషల్ మీడియాలో ప్రజాహితార్థం విన్నూతమైన పోస్టులు పెడుతున్న సంగతి తెలిసిందే. సినిమా పోస్టర్స్ - ఫన్నీ మీమ్స్ ద్వారా ప్రజలకు ట్రాఫిక్ రూల్స్ గురించి వివరిస్తూ వస్తున్నారు. ఈ క్రమంలో నేడు ప్రేక్షకుల ముందుకు వచ్చిన ''చావు కబురు చల్లగా'' పోస్టర్ ద్వారా ప్రజాహితార్థం ట్రాఫిక్ పోలీస్ పెట్టిన ఓ పోస్ట్ నెట్టింట వైరల్ అవుతోంది.

యువ హీరో కార్తికేయ - లావణ్య త్రిపాఠి జంటగా నటించిన సినిమా 'చావు కబురు చల్లగా'. అల్లు అరవింద్ సమర్పిస్తున్న ఈ చిత్రాన్ని పేగుళ్లపాటి కౌశిక్ తెరకెక్కించాడు. జీఏ2 బ్యానర్ పై బన్నీ వాస్ నిర్మించారు. ఇందులో కార్తికేయ బస్తీ బాలరాజ్ పాత్రలో.. లావణ్య 'మల్లిక' అనే విడో పాత్రలో నటించారు. ఈ సినిమా ప్రచారంలో భాగంగా ఇటీవల ఓ పోస్టర్ రిలీజ్ చేశారు. అందులో హీరో హీరోయిన్లు బైక్ పై కూర్చొని ఉంటారు. అయితే మన బస్తీ బాలరాజ్ హెల్మెట్ లేకుండా స్టైల్ గా ఆపిల్ ట్యాంక్ పై కూర్చొని డ్రైవ్ చేస్తుంటాడు. ఇప్పుడు ఇదే సైబరాబాద్ ట్రాఫిక్ పోలీస్ వారు ఉపయోగించుకున్నారు.

ఆ పోస్టర్ ని సైబరాబాద్ ట్రాఫిక్ పోలీస్ అధికారిక ట్విట్టర్ ఖాతాలో పోస్ట్ చేస్తూ ''హెల్మెట్లు పెట్టుకొని, సరిగ్గా నడిపితే ఎలాంటి కబుర్లు వినాల్సిన పని లేదు బస్తీ బాలరాజు గారు'' అంటూ ఓ మంచి కబురు ట్వీట్ చేశారు. ఈ ఫొటో కొద్ది సమయంలోనే ఊహించని రీతిలో వైరల్ అయిపోయింది. సోషల్ మీడియా ద్వారా ఇలాంటి పోస్టులతో ప్రజలను చైతన్య వంతం చేసేందుకు ట్రాఫిక్ పోలీసులు చేస్తున్న కృషిని అందరూ కొనియాడుతున్నారు.