'ఆర్.ఆర్.ఆర్' ప్రొడ్యూసర్ తనయుడి మూవీ హోల్డ్ లో పెట్టారా...?

టాలీవుడ్ భారీ బడ్జెట్ సినిమాలకు కేరాఫ్ అడ్రెస్ గా నిలిచిన ప్రముఖ నిర్మాత డీవీవీ ఎంటర్టైన్మెంట్స్ అధినేత డీవీవీ దానయ్య.. తన కుమారుడిని హీరోగా ఇంట్రడ్యూస్ చేయడానికి ప్రయత్నాలు జరుగుతున్న సంగతి తెలిసిందే. ఇప్పటికే చాలా మంది డైరెక్టర్లతో సంప్రదింపులు జరిపిన డీవీవీ దానయ్య చివరికి డైరెక్టర్ శ్రీవాస్ చేతిలో తన కొడుకుని పెట్టాడని వార్తలు వచ్చాయి. 'లక్ష్యం' 'లౌక్యం' వంటి సినిమాలతో మంచి గుర్తింపు తెచ్చుకున్న శ్రీవాస్ తో తనయుడి లాంఛింగ్ ప్లాన్ చేసిన దానయ్య.. నిర్మాణ బాధ్యతలు మాత్రం మరో ప్రొడ్యూసర్ భ‌రత్ చౌదిరి కి అప్పగించాడని.. కాకపోతే బ్యాక్ ఎండ్ లో దానయ్య సపోర్ట్ ఉంటుందని ఫిలిం సర్కిల్స్ లో అనుకున్నారు.

అయితే ఇప్పుడు లేటెస్టుగా ఈ సినిమాని ప్రస్తుతానికి హోల్డ్ లో పెట్టారని టాక్ నడుస్తోంది. ప్రస్తుతం రాజమౌళి దర్శకత్వంలో భారీ బడ్జెట్ తో 'ఆర్.ఆర్.ఆర్' సినిమా నిర్మిస్తున్న దానయ్య.. ఈ సినిమా సెట్స్ పై ఉండగానే తనయుడి చిత్రాన్ని స్టార్ట్ చేస్తారని అనుకున్నారు. కానీ స‌రైన క‌థ సెట్ కాకపోవడంతో ఈ ప్రాజెక్ట్ ని ప్ర‌స్తుతానికి హోల్డ్ లో పెట్టారని ఇండస్ట్రీ వర్గాల్లో కామెంట్స్ వినిపిస్తున్నాయి. ఈ వార్తల్లో నిజమెంతో తెలియదు కానీ దానయ్య తనయుడి లాంఛింగ్ మాత్రం ఇంకొన్నాళ్లు వాయిదా పడినట్లు తెలుస్తోంది. టాలీవుడ్ లో హీరోలుగా పరిచయమైన ప్రొడ్యూసర్స్ కొడుకుల సక్సెస్ రేట్ తక్కువగా ఉంది. ఈ నేపథ్యంలో 'ఆర్.ఆర్.ఆర్' ప్రొడ్యూసర్ తనయుడి పరిస్థితి ఎలా ఉంటుందో చూడాలి.