దంగల్ పోరాటానికి పైరసీ కాటు

సినిమా ఇండస్ట్రీపై పైరసీ పగ పట్టేసింది. ఇప్పుడే కాదు.. గతంలోను ఇలాంటివి చాలాంటివే జరిగాయి. కానీ ఇప్పుడు పైరసీ విశ్వరూపం చూపించేస్తోంది. సినిమాల్లో ప్రదర్శన జరుగుతున్న సమయంలోనే ఆన్ లైన్ లో లైవ్ స్ట్రీమింగ్ చేసేయడం.. అసలు సినిమా విడుదలకు ముందే ఇంటర్నెట్ ప్రత్యక్షం అయిపోవడం జరుగుతున్నాయి.

తాజాగా ఆమిర్ ఖాన్ మూవీ దంగల్ కు కూడా ఈ తిప్పలు తప్పలేదు. ఆమిర్ నటించిన దంగల్.. రికార్డు వసూళ్లతో దూసుకుపోతున్న సంగతి తెలిసిందే. తొలి రోజున దాదాపు 30 కోట్ల వసూళ్లు సాధించి సెన్సేషన్ క్రియేట్ చేసింది. డీమానిటైజేషన్ ను ఎదిరించి పోరాడి.. ఈ స్థాయి వసూళ్లను సాధించడం ఆమిర్ కి మాత్రమే సాధ్యం అనాల్సిందే. అయితే.. ఇప్పటికే దంగల్ కి సంబంధించిన పైరసీ ప్రింట్స్ ఆన్ లైన్ లోకి వచ్చేశాయి. ఇప్పటికే అనేక డౌన్ లోడ్స్ అయిపోయినట్లు కూడా తెలుస్తోంది.

మరోవైపు ఫేస్ బుక్ లో లైవ్ స్ట్రీమింగ్ చేసి మరీ దంగల్ ను ప్రదర్శించారంటే.. ఎంతగా ఈ పైరసీదారులు రెచ్చిపోతున్నారో అర్ధమవుతుంది. వీకెండ్స్ లో మరింతగా పుంజుకుని.. రికార్డు కలెక్షన్స్ సాధిస్తుందనే అంచనాలు ఈ పైరసీ కారణంగా మందగించాయి. ఈ ఏడాది ఉడ్తా పంజాబ్.. గ్రేట్ గ్రాండ్ మస్తీ చిత్రాలు కూడా పైరసీ కారణంగా భారీగా నష్టపోయిన సంగతి తెలిసిందే.



Like Us on Facebook : https://www.facebook.com/Tupakidotcom/