పోలా.. అమీర్ ఖాన్ అదిరిపోలా..

రెజ్లర్ నిజ జీవిత కథతో సినిమానా.. ఏముంటుందండీ అందులో.. ‘పీకే’ లాంటి అద్భుతమైన సినిమా తర్వాత అమీర్ ఖాన్ కు వేరే సబ్జెక్టే దొరకలేదా.. అంటూ రకరకాల సెటైర్లు వినిపించాయి ‘దంగల్’ విషయంలో. కానీ ఈ రోజు అమీర్ ఖాన్ రిలీజ్ చేసిన ఫస్ట్ లుక్ పోస్టర్ చూస్తుంటే జనాలకు దిమ్మదిరిగిపోతుంది. ఎలాంటి సాదాసీదా కథాంశమైనా సరే.. అమీర్ హ్యాండ్ పడగానే అది అద్భుత: అనిపించడం ఖాయమని ‘దంగల్’ పోస్టర్ చూస్తే అర్థమైపోతోంది. నిన్న ట్విట్టర్ లో మట్టి బ్యాగ్రౌండ్ లో ఓ పిక్ పెట్టి.. కల్ సే (రేపటి నుంచి) అంటూ ఓ హింట్ ఇచ్చాడు అమీర్. ఈ రోజు ఆ బ్యాగ్రౌండ్ ‌తో ‘దంగల్’ ఫస్ట్ లుక్ పోస్టర్ రిలీజ్ చేశాడు. షూటింగ్ ఈ రోజే మొదలని పేర్కొన్నాడు.

రెజ్లింగ్ పోటీలు అంతర్జాతీయ స్థాయిలో టర్ఫ్ మీద జరుగుతాయి కానీ.. మన దేశంలో రెజ్లర్ ల సాధన అంత ఎర్రమట్టితో నిండిన బురద మైదానాల్లో జరుగుతుంది. దానికి సూచికగా ఎర్రమట్టి బ్యాగ్రౌండ్ తో ‘దంగల్’ ఫస్ట్ లుక్ రెడీ చేసింది అమీర్ బృందం. ఆ మట్టిలోంచి చీల్చుకొచ్చి అమీర్ ముఖం చూడగానే ఎవ్వరైనా ఫ్లాట్ అయిపోవడం ఖాయం. పొగట్ అనే నార్త్ ఇండియన్ రెజ్లర్ జీవిత కథతో ఈ సినిమాను తెరకెక్కిస్తున్నాడు దర్శకుడు నితీశ్ తివారి. ఈ సినిమాకు అమీర్ ఖానే నిర్మాత. డిస్నీ వాళ్ల నిర్మాణ భాగస్వామ్యం కూడా ఉంది. ఇందులో రెండు విభిన్న అవతారాల్లో కనిపించబోతున్నాడు మిస్టర్ పర్ఫెక్షనిస్ట్. ఒక పాత్ర కోసం దాదాపు ముప్ఫై కిలోలు బరువు పెరిగాడు. ఈ అవతారంలోనే ఇప్పుడు షూటింగులో పాల్గొనబోతున్నాడు. ఆ తర్వాత సన్నబడి షూటింగుకి వస్తాడు. 2016 క్రిస్మస్ కు దంగల్ రిలీజవుతుందని పోస్టర్ లోనే ప్రకటించారు.