‘భీమ్లా నాయక్‌’ ఫ్యామిలీలోకి డేనియల్ శేఖర్ భార్య..!

పవన్‌ కల్యాణ్, దగ్గుబాటి రానా ప్రధాన పాత్రల్లో తెరకెక్కుతున్న తాజా చిత్రం ''భీమ్లా నాయక్‌''. ఇందులో భీమ్లానాయక్‌ అనే పవర్ ఫుల్ పోలీసాఫీసర్ పాత్రలో పవన్ కనిపించనున్నారు. అలాగే డేనియల్‌ శేఖర్‌ గా రానా అలరించనున్నారు. ఇక పవన్‌ కు జోడీగా నిత్యా మీనన్‌.. రానా కు జోడీగా సంయుక్త మీనన్ సందడి చేయనున్నారు.

అయితే గురువారం 'భీమ్లానాయక్‌' షూటింగ్ లో మలయాళ బ్యూటీ సంయుక్త మీనన్ పాల్గొన్నట్లు చిత్ర యూనిట్ తెలిపింది. భీమ్లా ఫ్యామిలీలోకి సంయుక్తకు స్వాగతం తెలుపుతూ చిత్ర బృందం ఓ స్పెషల్‌ పోస్టర్‌ ని సోషల్ మీడియాలో షేర్ చేసింది. ఈ చిత్రంలో ఆమె రానాకు సతీమణి పాత్రలో కనిపించనున్నారు. ఇది సంయుక్త కు తెలుగు డెబ్యూ మూవీ. అమ్మడికి ఎలాంటి గుర్తింపు తెచ్చిపెడుతుందో చూడాలి.

కాగా, 'భీమ్లా నాయక్‌' చిత్రంలో రానాకు జోడీగా ఎవరు నటించనున్నారనే విషయం మీద గత కొన్నిరోజులుగా చర్చ జరుగుతోంది. మొదట ఐశ్వర్య రాజేశ్‌ ని హీరోయిన్ గా తీసుకోగా.. డేట్స్ అడ్జస్ట్ అవకపోవడంతో ఈ ప్రాజెక్ట్ నుంచి తప్పుకున్నట్లు వార్తలు వచ్చాయి. ఈ క్రమంలో మలయాళీ నటి సంయుక్త మేనన్‌ పేరు తెరపైకి వచ్చింది. ఈ నేపథ్యంలో రానా కు జోడీగా ఆమెనే ఫిక్స్ చేసినట్లు మేకర్స్ ప్రకటించారు.

ఇద్దరు సమజ్జీవులు మధ్య ఉండే అహం - ఆత్మాభిమానం అనే అంశాలను ఆధారంగా చేసుకుని ''భీమ్లానాయక్‌'' సినిమాని రూపొందిస్తున్నారు. ఇది మలయాళంలో సూపర్‌ హిట్‌ అయిన 'అయ్యప్పనుమ్‌ కోషియమ్‌' చిత్రానికి అధికారిక తెలుగు రీమేక్‌. సాగర్ కె చంద్ర ఈ చిత్రానికి దర్శకత్వం వహిస్తున్నారు. త్రివిక్రమ్ శ్రీనివాస్ దీనికి స్క్రీన్ ప్లే - మాటలు అందిస్తున్నారు.

సితార ఎంటర్టైన్మెంట్స్ బ్యానర్ పై సూర్యదేవర నాగవంశీ ప్రతిష్టాత్మకంగా ఈ చిత్రాన్ని నిర్మిస్తున్నారు. ఎస్ఎస్ థమన్ ఈ సినిమాకి సంగీతం సమకూరుస్తున్నారు. రవి కె చంద్రన్ సినిమాటోగ్రాఫర్ గా.. ఏఎస్ ప్రకాష్ ఆర్ట్ డైరెక్టర్ గా వర్క్ చేస్తున్నారు. నవీన్ నూలి ఎడిటింగ్ బాధ్యతలు నిర్వహిస్తున్నారు. 'భీమ్లా నాయక్' సినిమా వచ్చే ఏడాది సంక్రాంతి కానుకగా జనవరి 12న ప్రేక్షకుల ముందుకు రానుంది. ఇప్పటికే ఈ మూవీ నుంచి విడుదలైన టీజర్లు, పాటలు సినిమాపై అంచనాలు పెంచేశాయి.