ప్రభాస్ బాహుబలి.. వాడకం అంటే ఇదే

ఓ సినిమా పేరు ప్రభాస్ బాహుబలి. అదేంటీ అనుకోకండీ అదంతే. బాహుబలి ప్రభాస్ అయినా.. ఇప్పుడీ రెండు పేర్లను తెగ వాడేస్తున్నారు. బాహుబలి పేరు చెబితే ఇండస్ట్రీలో వైబ్రేషన్స్ వస్తున్నాయి. మరోవైపు ప్రభాస్ కి నేషనల్ లెవెల్ లో స్టార్ డం వచ్చేసింది. ఈ రెండింటినీ కలిపి ప్రభాస్ బాహుబలి అనే టైటిల్ తో క్యాష్ చేసేసుకుంటోంది ఓ సినిమా యూనిట్.

త్వరలో కోలీవుడ్ లో రిలీజ్ కానున్న సినిమా పేరు ప్రభాస్ బాహుబలి. ఎవరి సినిమాకో ఇలా వాడ్డం కాదు.. ఇది ప్రభాస్ నటించిన సినిమానే. ప్రస్తుతం బాహుబలి ది కంక్లూజన్ తప్ప యంగ్ రెబల్ స్టార్ వేరే సినిమాలు చేయడం లేదు కానీ.. ఇది ఈ హీరో నటించిన పాత సినిమా. 2010లో ప్రభాస్ నటించిన డార్లింగ్ చిత్రాన్ని తమిళ డబ్బింగ్ చేసేసి.. దీనికి ప్రభాస్ బాహుబలి అనే టైటిల్ పెట్టేశారు.

ఈ మూవీకి కరుణాకరన్ దర్శకత్వం వహించడం, కాజల్ అగర్వాల్ కి తమిళనాట కూడా క్రేజ్ ఉండడంతో పాటు ప్రభాస్ బాహుబలి అనగానే ఆసక్తి నెలకొంది. ఆరేళ్ల క్రితం తెలుగులో సక్సెస్ సాదించిన డార్లింగ్.. త్వరలో ప్రభాస్ బాహుబలిగా కోలీవుడ్ ప్రేక్షకులను మెప్పించేందుకు సిద్ధమైంది.