'దసరా' రిలీజ్ డేట్ లాక్.. ఊర మాస్ అవతార్ లో నాని..!

నేచురల్ స్టార్ నాని నటిస్తున్న లేటెస్ట్ మూవీ "దసరా". ఇది నాని కి ఫస్ట్ పాన్ ఇండియా ప్రాజెక్ట్. శ్రీ లక్ష్మీ వెంకటేశ్వర సినిమాస్ బ్యానర్‌ పై సుధాకర్ చెరుకూరి భారీ ఎత్తున నిర్మిస్తున్న ఈ రూరల్ మాస్ యాక్షన్ ఎంటర్‌టైనర్‌ తో శ్రీకాంత్ ఓదెల దర్శకుడిగా ఇండస్ట్రీకి పరిచయం అవుతున్నాడు.

'దసరా' సినిమా కోసం నాని తొలిసారిగా ఊర మాస్ అండ్ రగ్గుడ్ లుక్ లోకి మేకోవర్ అయ్యాడు. ఇందులో అతను తెలంగాణ యాసలో డైలాగ్స్ చెప్పబోతున్నాడు. అనౌన్స్ మెంట్ వీడియోలో అతని డైలాగులు ఆశ్చర్యపరిచాడు. ఈ సినిమా కథంతా పెద్దపల్లి జిల్లాలోని గోదావరరిఖని లోని సింగరేణి బొగ్గు గనులలో ఉన్న ఒక గ్రామంలో సెట్ చేయబడింది.

ఇప్పటికే విడుదల 'దసరా' ఫస్ట్ లుక్ మరియు గ్లింప్స్ కు విశేష స్పందన లభించింది. నాని తన కంఫర్ట్ జోన్ నుంచి బయటకు వచ్చి, మాస్ అండ్ రా రస్టిక్ అవతార్ లో అభిమానులకు షాక్ ఇచ్చాడు. ఇంతకు ముందెన్నడూ చూడని పాత్రలో కనిపించనున్నాడని హింట్ ఇచ్చారు. దీని కోసం నాని కఠినమైన మేకోవర్ చేయించుకున్నాడని తెలుస్తోంది.

ఇదిలా ఉంటే మేకర్స్ ఈరోజు ఓ బిగ్ అప్‌డేట్‌ తో వచ్చారు. సినిమా రిలీజ్ డేట్ ను ప్రకటించారు. 'దసరా' చిత్రాన్ని శ్రీరామ నవమి సందర్భంగా 30 మార్చి, 2023న ప్రపంచవ్యాప్తంగా విడుదల కానున్నట్లు తెలిపారు. గురువారం రిలీజ్ కావడంతో 4 రోజుల లాంగ్ వీకెండ్ ను క్యాష్ చేసుకునే అవకాశం ఉంటుంది. అంతేకాదు అప్పుడే ప్రారంభమయ్యే సమ్మర్ హాలిడేస్ ని కూడా ఉపయోగించుకోవచ్చు. అన్ని భాషల్లోనూ విడుదలకు ఇది సరైన డేట్ అని చెప్పాలి.

ఇకపోతే రిలీజ్ డేట్ అనౌన్స్‌మెంట్ పోస్టర్‌ లో నాని ఊర మాస్‌ గా కనిపిస్తున్నాడు. అతని శరీరం మరియు దుస్తులు పూర్తిగా దుమ్ము పట్టిపోయి ఉన్నాయి. చిందరవందరగా ఉన్న జుట్టు మరియు అతని చేతిలో ఉన్న మద్యం సీసా మొరటుతనాన్ని జోడిస్తుంది.

ఈ పోస్టర్ లో ఆకర్షించే మరో అంశం ఏంటంటే బ్యాక్‌ గ్రౌండ్‌ లో ఉన్న ఒకప్పటి పాపులర్ శృంగార తార సిల్క్ స్మిత. ఇందులో ఆమె తన గోళ్లు కొరుకుతూ ఉన్న పోజ్ ని మనం చూడవచ్చు. సినిమా నేపథ్యానికి తగ్గట్టుగా సిల్క్ పోస్టర్ ని ఉపయోగించినట్లు తెలుస్తోంది.

'దసరా' సినిమా షూటింగ్ నిన్నటి నుంచి హైదరాబాద్‌ లో వేసిన స్పెషల్ సెట్ లో తిరిగి ప్రారంభమైంది. ప్రధాన తారాగణం అంతా ఈ షూటింగ్‌ లో పాల్గొంటున్నారు. ఇందులో నాని సరసన జాతీయ అవార్డు గ్రహీత కీర్తి సురేష్ కథానాయికగా నటిస్తోంది. సముద్రఖని - సాయి కుమార్ - జరీనా వహాబ్ ఇతర ప్రధాన పాత్రలు పోషిస్తున్నారు.

కోలీవుడ్ పాపులర్ మ్యూజిక్ డైరెక్టర్ సంతోష్ నారాయణన్ సంగీతం సమకూరుస్తున్న ఈ చిత్రానికి సత్యన్ సూర్యన్ సినిమాటోగ్రఫీ నిర్వహిస్తున్నారు. నవీన్‌ నూలి ఎడిటర్‌ గా.. అవినాష్‌ కొల్లా ప్రొడక్షన్‌ డిజైనర్‌ గా వర్క్ చేస్తున్నారు. స్టంట్ డైరెక్టర్స్ అన్బరీవ్ యాక్షన్ పార్ట్ డిజైన్ చేశారు. విజయ్‌ చాగంటి ఎగ్జిక్యూటివ్‌ నిర్మాతగా వ్యవహరిస్తున్నారు. 'దసరా' చిత్రం పాన్ ఇండియా స్థాయిలో తెలుగు, తమిళం, కన్నడ, మలయాళం మరియు హిందీ భాషలలో విడుదల కానుంది.