దసరా రొటీన్ లైన్.. నాని బిగ్ రిస్క్?

నేచురల్ స్టార్ నాని ఎలాంటి సినిమా చేసిన కూడా అందులో ఏదో ఒక న్యూ పాయింట్ ఉండేలా జాగ్రత్తలు తీసుకుంటూ ఉంటాడు. అయితే కొన్నిసార్లు ఎంత కొత్త తరహా కథను సెలెక్ట్ చేసుకున్నా కూడా జనాలను పెద్దగా ఆకర్షించకపోవచ్చు. ఇటీవల వచ్చిన అంటే సుందరానికి సినిమా ఊహించని రిజల్ట్ అందుకుంది. అసలైతే ఈ కామెడీ సినిమా నాని కెరీర్ లో బిగ్ సక్సెస్ అవుతుంది అని అనుకున్నారు.

కానీ అందుకు భిన్నంగా సినిమాలో పెద్దగా మ్యాటర్ లేదు అని ఒకసారి చూడడమే ఎక్కువనే కామెంట్స్ అయితే చాలానే వచ్చాయి. అంతకుముందు వచ్చిన శ్యామ్ సింగర్ సినిమా కూడా ఏదో అనుకుంటే ఇంకా ఏదోలా ఉంది అంటూ మొత్తానికి పర్వాలేదు అనే టాక్ అందుకుంది. కానీ కమర్షియల్ గా మాత్రం నాని సినిమా ఇటీవల కాలంలో పెద్దగా లాభాలు అందించింది చాలా తక్కువ.

ఇక ప్రస్తుతం అతను దసరా సినిమాతో సిద్ధమవుతున్న విషయం తెలిసిందే. నాని కెరీర్ మొత్తంలోనే అత్యధిక బడ్జెట్ తో ఈ సినిమాను నిర్మిస్తున్నారు. అయితే ఇది వరకే కొన్నిసార్లు నిర్మాతలు బడ్జెట్ విషయంలో కంగారు పడినప్పటికీ నాని వారితో ప్రత్యేకంగా మాట్లాడి ఖర్చు విషయంలో కాంప్రమైజ్ కావద్దని ఒప్పించినట్లు తెలుస్తోంది.

ఈ సినిమా ఫస్ట్ లుక్ టీజర్ చూసిన తర్వాత ఓ మిడియం రేంజ్ పుష్ప తరహాలో ఉంటుంది అని టాక్ అయితే గట్టిగానే వినిపించింది. ఎందుకంటే నాని లుక్ కూడా ఆతరహాలో ఉంది. కానీ ప్రస్తుతం అందుతున్న సమాచారం ప్రకారం ఇది పక్కా లవ్ స్టోరీ అని మరొక సమాచారం వినిపిస్తోంది. సినిమాలో నాని ఒక స్లమ్ ఏరియాలో ఉండే మాస్ అబ్బాయిగా కనిపిస్తాడట.

ఇక కీర్తి సురేష్ ఒక ధనవంతుడు కూతురుగా ఉంటుందట. ఇక వీరిద్దరి మధ్యలో కొనసాగే ఇంటెన్స్ లవ్ డ్రామా ఇతర హై వోల్టేజ్ ఎపిసోడ్స్ కు దారితీస్తుంది అని తెలుస్తోంది. ఇదేమి పెద్దగా ఆశ్చర్యపోయే కొత్త స్టోరీలైన అయితే కాదట మరి దర్శకుడు ఆ లైన్ ను ఎంతవరకు కొత్తగా చూపిస్తాడు అనేది చూడాలి.

శ్రీకాంత్ ఓదెలా సుకుమార్ శిష్యుడే కాబట్టి ఓ వర్గం ఆడియన్స్ లో మంచి అంచనాలు ఉన్నాయి. మరి ఫైనల్ గా దసరా నానికి కెరీర్ కు ఎలాంటి బూస్ట్ ఇస్తుందో చూడాలి.