దాసరి మాటలు భలే భలే..

దాసరి నారాయణరావు ఏ వేడుకకు వచ్చినా.. ఏ వేదిక ఎక్కినా.. మైకు పట్టారంటే ఎక్కడో ఓ చోట కొసమెరుపు లాంటి ఓ మాట అనేసే వేదిక దిగుతారు. నిన్న 'కేరింత' సినిమా స్పెషల్‌ షో కోసం ఆయన్ని ప్రసాద్‌ ల్యాబ్స్‌కు ఆహ్వానించారు దిల్‌ రాజు. సినిమా చూసి.. చాలా బాగుందని, దిల్‌ రాజు చాలా బాగా తీశాడని, ఈ సినిమా సక్సెస్‌ క్రెడిట్‌ అంతే అతడితే అని తెగ పొగిడేసిన దాసరి... చివర్లో ఓ మాట అన్నారు. ఇకపై దిల్‌ రాజు పెద్ద హీరోలతో సినిమాలే తీయొద్దన్నదే ఆ మాట. దాసరి ఆ మాట అన్నపుడు భలే చిత్రమైన ఎక్స్‌ప్రెషన్‌ ఇచ్చాడు దిల్‌ రాజు.

బహుశా దిల్‌ రాజు మనసు తెలిసే దాసరి ఆ మాట అన్నారో ఏమో కానీ.. నిజానికి ప్రస్తుతం రాజు ఫీలింగ్‌ అదే అన్నది వాస్తవం. ఎందుకంటే లో, మోడరేట్‌ బడ్జెట్‌లో సినిమాలు తీసినపుడు భారీగా లాభాలు మూటగట్టుకున్నాడు రాజు. కానీ పెద్ద హీరోలతో తీసిన సినిమాలతో అతడికి పెద్దగా మిగిలిందేమీ లేదు. మిస్టర్‌ పర్ఫెక్ట్‌ దగ్గర్నుంచి ఎవడు వరకు చాలావరకు స్టార్స్‌తో సక్సెస్‌ఫుల్‌ సినిమాలైతే తీశాడు కానీ.. అవేవీ కూడా రాజుకు భారీ లాభాలేమీ తెచ్చిపెట్టలేదు. చాలా వరకు ఇందులో కష్టం మీద బ్రేక్‌ఈవెన్‌కు వచ్చిన సినిమాలే. సీతమ్మ వాకిట్లో సిరిమల్లె చెట్టు సినిమా 50 కోట్లకు పైగా వసూలు చేసినా.. పారితోషకాలు, బడ్జెట్‌ లెక్కలతో పోలిస్తే దాని వల్ల రాజుకు మిగిలిందేమీ లేదు. అందుకే అంత పెట్టుబడి పెట్టి ఇబ్బంది పడటం ఎందుకని.. తన పాత రూట్లోకి వెళ్లిపోయి లో బడ్జెట్‌ సినిమాలు తీస్తున్నాడు రాజు. పిల్లా నువ్వు లేని జీవితం సినిమాతో బాగానే వెనకేసుకున్న రాజుకు కేరింత కూడా బాగానే మిగలబెట్టేలా కనిపిస్తోంది.