న‌యా రాముల‌మ్మ... ల‌క్ష్మీప్ర‌స‌న్న‌

క‌డ‌వ‌మీద క‌డ‌వపెట్టి... అంటూ ఇప్ప‌టికీ `ఒసేయ్ రాముల‌మ్మ‌`ని గుర్తు చేసుకొంటుంటాం. దాస‌రి నారాయ‌ణ‌రావు తీసిన సంచ‌ల‌న చిత్రాల్లో అదొక‌టి. ఆ చిత్రంతో విజ‌య‌శాంతి న‌ట‌న‌లోని మ‌రో కొత్త కోణాన్ని చూశారంతా. దాస‌రికి ఆఖ‌రిగా బ్లాక్ బ‌స్ట‌ర్‌ ని అందించిన చిత్రం కూడా అదే. ఆ స్థాయి విజ‌యం కోసం దాస‌రి మ‌ళ్లీ చాలా ప్ర‌య‌త్నించారు కానీ సాధ్యం కాలేదు. అందుకే మ‌ళ్లీ అదే చిత్రానికి సీక్వెల్ చేయాల‌ని దాస‌రి కొన్ని సంద‌ర్భాల్లో ఆలోచ‌న కూడా చేశారు. విజ‌య‌శాంతి కూడా `ఒసేయ‌ర్ రాముల‌మ్మ‌` సీక్వెల్‌ లో న‌టించేందుకు సిద్ధ‌మే అని ప్ర‌క‌టించింది. కార‌ణ‌మేంటో తెలియ‌దు కానీ... ఆ చిత్రం సెట్స్‌ పైకి వెళ్ల‌లేదు.

అయితే ఇప్పుడు రాముల‌మ్మ‌ని దాస‌రి మ‌రో న‌టిలో చూస్తున్నారు. ఆ న‌టి ఎవ‌రో కాదు.. ల‌క్ష్మీప్ర‌స‌న్న‌. నిన్న జ‌రిగిన ల‌క్ష్మీబాంబు పాట‌ల వేడుక‌కి దాస‌రి ముఖ్య అతిథిగా హాజ‌ర‌య్యారు. ఈ సంద‌ర్భంగా ఆయ‌న మాట్లాడుతూ ``ల‌క్ష్మీబాంబు సినిమాలో ల‌క్ష్మీప్ర‌స‌న్న‌నీ - న‌ట‌న‌ని చూస్తుంటే ఆమెతో `ఒసేయ్ రాముల‌మ్మ‌`లాంటి సినిమాని చేయాల‌నిపిస్తోందన్నారు. దాస‌రి చెప్పిన‌ట్టుగానే ఒసేయ్ రాముల‌మ్మ‌లాంటి క‌థ‌కి న్యాయం చేయ‌గ‌ల స‌మ‌ర్థ‌త ల‌క్ష్మీప్ర‌స‌న్నలో ఉంది. ఆమె ఎలాంటి పాత్ర‌ల్లోనైనా ఒదిగిపోగ‌ల‌ద‌ని చాలా సినిమాలతో నిరూపించింది. ఇక దాస‌రి నారాయ‌ణ‌రావుదే ఆల‌స్య‌మ‌న్న‌మాట‌. ఆయ‌న `ఒసేయ్ రాముల‌మ్మ‌2` క‌థ‌కి న‌డుం బిగిస్తే మాత్రం తెలుగు తెర‌కు మ‌రో కొత్త రాముల‌మ్మ ప‌రిచ‌య‌మైన‌ట్టే.

Like Us on Facebook : https://www.facebook.com/Tupakidotcom/