కామ్రేడ్ కు కౌంట్ డౌన్ షురూ..!

ప్రస్తుతం టాలీవుడ్ లో సెట్స్ పై ఉన్న క్రేజీ సినిమాల్లో విజయ్ దేవరకొండ - రష్మిక మందన్న జంటగా నటించిన 'డియర్ కామ్రేడ్' ఒకటి. యూత్ సెన్సేషన్ గా మారిన విజయ్ దేవరకొండ హీరోగా నటించడం.. బ్లాక్ బస్టర్ 'గీత గోవిందం' జోడీ అయిన విజయ్ -రష్మిక జోడీ మరోసారి రిపీట్ కావడంతో ఈ సినిమాపై ఆసక్తి ఎక్కువగానే ఉంది. ఇప్పటికే ఈ సినిమాకు సంబంధించిన ప్రోమోలు పాజిటివ్ బజ్ ను క్రియేట్ చేశాయి.

తాజాగా 'డియర్ కామ్రేడ్' టీమ్ మరో కొత్త పోస్టర్ రిలీజ్ చేసింది. ఈ సినిమాను జులై 26 న రిలీజ్ చేసేందుకు డేట్ ఫిక్స్ చేసిన సంగతి తెలిసిందే. ఇప్పటినుంచి విడుదలకు సరిగ్గా యాభై రోజులు ఉంది. దీంతో డియర్ కామ్రేడ్ రిలీజ్ కు కౌంట్ డౌన్ అన్నట్టుగా '50 డేస్ టు గో' అంటూ ఒక కొత్త పోస్టర్ రిలీజ్ చేశారు. ఈ పోస్టర్ లో ఇంటెన్స్ లుక్ లో ఉన్న విజయ్ పరిగెడుతూ ఉన్నాడు. విజయ్ వెనక మరికొందరు కూడా పరిగెడుతూ ఉన్నారు.

జస్టిన్ ప్రభాకరన్ 'డియర్ కామ్రేడ్' చిత్రానికి సంగీతం అందిస్తున్నాడు. భరత్ కమ్మ దర్శకత్వంలో తెరకెక్కుతున్న ఈ సినిమాను మైత్రీ మూవీ మేకర్స్.. బిగ్ బెన్ సినిమాస్ వారు సంయుక్తంగా నిర్మిస్తున్నారు. ఈ సినిమాను తెలుగుతో పాటుగా తమిళం.. కన్నడ.. మలయాళం భాషలలో ఒకేసారి విడుదల చేస్తున్నారు.