ఆ హీరోయిన్ని చూస్తే షాకైపోతారు

మనీషా కొయిరాలా అనగానే పాలరాతి శిల్పం లాంటి అందమైన రూపం కళ్లముందు మెదులుతుంది. 90ల్లో దిల్ సే.. క్రిమినల్.. భారతీయుడు లాంటి సినిమాలతో కుర్రాళ్ల గుండెల్ని కోసేసింది మనీషా. కోట్లాది మంది ఆమె అందానికి ముగ్ధులైపోయారు. అలాంటి హీరోయిన్ ఇప్పుడు ఓ సినిమా కోసం ఎత్తిన కొత్త అవతారం చూస్తే షాకైపోవాల్సిందే.

‘డియర్ మాయ’ అనే బాలీవుడ్ సినిమా కోసం పూర్తిగా లుక్ మార్చేసింది మనీషా. ఇందులో ఆమె వయసుమళ్లిన మహిళ పాత్ర పోషిస్తోంది. మామూలుగానే మనీషాలో గ్లామర్ టచ్ పోగా.. ఈ సినిమా కోసం ఆమెను మరింత డీగ్లామరైజ్డ్ గా చూపిస్తున్నారు. మనీషాను ఇలా చూడటం ఆమె అభిమానులకు రుచించని విషయమే. సునయన భట్నాగర్ ఈ చిత్రానికి దర్శకత్వం వహిస్తోంది. ఇదొక స్ఫూర్తిదాయ కథాంశంతో తెరకెక్కిన లేడీ ఓరియెంటెడ్ మూవీ అంటున్నారు.

క్యాన్సర్ నుంచి కోలుకుని మళ్లీ సాధారణ జీవితం గడుపుతున్న మనీషా.. సెకండ్ ఇన్నింగ్స్ లో నటనకు ప్రాధాన్యమున్న పాత్రలు ఎంచుకుంటోంది. వయసు మళ్లిన పాత్రల్లో నటించడానికి ఆమె సంకోచించట్లేదు. రాజ్ కుమార్ హిరాని దర్శకత్వంలో సంజయ్ దత్ జీవిత కథ ఆధారంగా తెరకెక్కుతున్న సినిమాలో మనీషా.. సంజూ తల్లి నర్గీస్ దత్ పాత్ర పోషిస్తుండటం విశేషం.



Like Us on Facebook : https://www.facebook.com/Tupakidotcom/