సినిమా ఫ్లాపైనా ఆమే కావాలంటున్నాడు

దీపికా పదుకొనే ఫస్ట్ హాలీవుడ్ మూవీ ‘ట్రిప్లెక్స్’ విషయంలో ఎంత హంగామా నడిచిందో కొత్తగా చెప్పాల్సిన పని లేదు. ఆ సినిమా మొదలైనప్పట్నుంచి విడుదలయ్యే వరకు దీపిక గాల్లో తేలిపోయింది. బాలీవుడ్ సినిమాల్ని.. ఇక్కడి మీడియాను పట్టించుకోనట్లే కనిపించింది. ఈ సినిమాకు ఇండియాలో స్పెషల్ ప్రిమియర్ షో వేయడం.. దానికి హీరో విన్ డీజిల్ హాజరై సందడి చేయడం.. ఇలా హడావుడేం తక్కువ లేదు. కానీ ఎంత చేసినా ఏం ప్రయోజనం? సినిమా హిట్టవలేదు. ‘ట్రిప్లెక్స్’ సిరీస్ అన్నింట్లోకి లేటెస్ట్ మూవీనే వేస్ట్ అని తేల్చారు క్రిటిక్స్. వసూళ్లు కూడా ఆశించిన స్థాయిలో లేదు. దీపికకు పెద్దగా గుర్తింపు కూడా దక్కలేదు. దీంతో హాలీవుడ్లో వెలిగిపోవాలన్న దీపిక ఆశలకు ఇంతటితో తెరపడినట్లే అనుకున్నారంతా.

కానీ ఆశ్చర్యకరంగా దీపికకు హాలీవుడ్లో మరో అవకాశం దక్కింది. అది ‘ట్రిప్లెక్స్’ సిరీస్ కొత్త సినిమాలోనే కావడం విశేషం. ఆ సిరీస్ లో కొత్త సినిమాకు కూడా దీపికనే కథానాయికగా తీసుకుందామని విన్ డీజిల్ ప్రపోజల్ పెట్టాడట. ఈ సిరీస్ లో సినిమాలన్నింటికీ హీరోనే ప్రధాన ఆకర్షణ కాబట్టి అతడి మాటను కాదనలేకపోయారట మేకర్స్. దీపిక.. విన్ డీజిల్ కు బాగా దగ్గరైందని.. అందుకే అతను ఇండియాలో హాలీవుడ్ సినిమాల మార్కెట్ తక్కువే అయినప్పటికీ ఇక్కడ ప్రిమియర్ షోకు హాజరయ్యాడని అప్పట్లో గుసగుసలు వినిపించాయి. దీపికను మళ్లీ హీరోయిన్ గా ఎంచుకోవడం చూస్తే ఈ ప్రచారం నిజమే అనిపిస్తోంది. మరి ‘ట్రిప్లెక్స్’ లేటెస్ట్ సీక్వెల్ అయినా అనుకున్నట్లుగా ఆడి.. దీపికకు హాలీవుడ్లో బ్రేక్ ఇస్తుందేమో చూడాలి.

Like Us on Facebook : https://www.facebook.com/Tupakidotcom/