డ్రగ్స్ కేసు: 3సార్లు సమన్లు జారీ చేసినా స్పందించని దీపికా మేనేజర్..!

బాలీవుడ్ డ్రగ్స్ వ్యవహారంపై నార్కోటిక్స్ కంట్రోల్ బ్యూరో మరోసారి పంజా విసిరిన సంగతి తెలిసిందే. ఇటీవల స్టార్ హీరోయిన్ దీపికా పడుకునే టాలెంట్ మేనేజర్ కరిష్మా ప్రకాష్ నివాసంలో ఎన్సీబీ అధికారులు సోదాలు నిర్వహించారు. ముంబై వెర్సోవాలోని కరిష్మా ఇంట్లో నిర్వహించిన దాడులలో 1.7 గ్రాముల నిషేధిత మాదక ద్రవ్యాలు మరియు రెండు సీసాల సీబీడీ ఆయిల్‌ లభించినట్లు ఎన్సీబీ జోనల్ డైరెక్టర్ సమీర్ వాంఖేడే వెల్లడించారు. ఈ నేపథ్యంలో డ్రగ్స్ కేసులో మరోసారి ఎన్సీబీ విచారణకు హాజరుకావాలని దీపికా మేనేజర్ కరిష్మా కు సమన్లు జారీ చేశారు. అయితే దాడుల తర్వాత కరిష్మా జాడ కనబడకపోవడంతో అనేక అనుమానాలను కలిగిస్తోంది. ఆమె బుధవారం విచారణకు హాజరు కాకపోవడంతో మరోసారి ఇంటికి నోటీసులు అంటించిన అధికారులు.. ఇప్పటివరకు మూడు సార్లు సమన్లు జారీ చేసారని తెలుస్తోంది. అయినా సరే కరిష్మా ప్రకాష్ జాడ కనిపించలేదని.. ఆమె మొబైల్ స్విచాఫ్ లో ఉందని.. మెయిల్ కు కూడా స్పందించడం లేదని ఎన్సీబీ వర్గాలు వెల్లడించినట్లు నేషనల్ మీడియా తెలిపింది.

కాగా, బాలీవుడ్ యువ హీరో సుశాంత్ సింగ్ రాజ్ పుత్ మృతి కేసుని విచారిస్తున్న క్రమంలో హీరోయిన్ రియా చక్రవర్తి వాట్సాప్ చాటింగ్ ఆధారంగా ఎన్సీబీ విచారణ సాగించింది. డ్రగ్స్ కేసులో పలువురు డ్రస్ డీలర్స్ తో పాటు రియాను ఆమె తమ్ముడిని అరెస్ట్ చేశారు. అయితే రియా ఇటీవలే బెయిల్ పై విడుదలైంది. అంతేకాకుండా టాలెంట్ మేనేజర్స్ జయ సాహా మరియు దీపిక మేనేజర్ కరిష్మా ప్రకాష్ లను కూడా ఎన్సీబీ ప్రశ్నించింది. వాట్సాప్ చాటింగ్ ఆధారంగా స్టార్ హీరోయిన్లు దీపిక పదుకొనే - సారా అలీఖాన్ - రకుల్ ప్రీత్ సింగ్ - శ్రద్ధా కపూర్ లను కూడా విచారించారు. అలానే ఎగ్జిక్యూటివ్ ప్రొడ్యూసర్ క్షితిజ్ రవి ప్రసాద్ మరియు అర్జున్ రామ్ పాల్ గర్ల్ ఫ్రెండ్ గాబ్రియెల్లా డెమెట్రియేడ్ సోదరుడుని కూడా ఎన్సీబీ అధికారులు అరెస్ట్ చేసి ఎంక్వైరీ చేస్తున్నారు. ఇప్పుడు కరిష్మా ప్రకాష్ కు నోటీసులు జారీ చేయడం.. ఆమె అప్పటి నుంచి అందుబాటులోకి రాకపోవడం మరిన్ని అనుమానాలను రేకిత్తిస్తోంది.