ఇంస్టా వీడియోతో హల్చల్ చేస్తున్న స్టార్ కపుల్!

బాలీవుడ్ స్టార్ కపుల్ దీపికా పదుకొనే - రణవీర్ సింగ్ సినీ అభిమానులకు మోస్ట్ ఫేవరేట్ జంటలలో ఒకరు. ఈ ఇద్దరు లవ్‌బర్డ్స్ ఎప్పటికప్పుడు వారి అభిమానులను సోషల్ మీడియాలో ఆకట్టుకుంటూనే ఉన్నారు. అయితే తాజాగా దీపిక ఓ క్యూట్ వీడియోతో అభిమానులకు ట్రీట్ ఇచ్చింది. ఈ వీడియోలో దీపికతో పాటు రన్వీర్ కూడా కాలుకదిపి డాన్స్ చేయడం మనం చూడవచ్చు. ఈ జంటను అభిమానులు ప్రేమగా దీప్‌వీర్ అని పిలుచుకుంటారు. అయితే ఈ నయా వీడియోలో ఇద్దరూ కూడా హూడీలు స్వెట్ ప్యాంట్లలో గుఫీ డాన్స్ చేశారు. ప్రస్తుతం ఆ వీడియో సోషల్ మీడియాలో ట్రెండ్ అవుతోంది. ఆ వీడియో కింద “వర్క్ ఇట్ బేబీ” అనే క్యాప్షన్‌ జోడించింది దీపిక.

ఇప్పటికే లక్షల లైక్స్ తో వీడియో వైరల్ అయిపోయింది. అయితే దీపిక, రన్వీర్ 2018 నవంబర్ 14న మూడు ముళ్లబంధంతో ఒక్కటయ్యారు. ప్రస్తుతం ఈ జంట కబీర్ ఖాన్ దర్శకత్వంలో తెరకెక్కుతున్న '83' మూవీలో కలిసి నటిస్తున్నారు. 1983లో ఇండియా క్రికెట్ వరల్డ్ కప్ గెలిచిన నేపథ్యంతో ఈ సినిమా రూపొందుతుంది. ఆ సినిమా ఈ ఏడాది జూన్ నెలలో తెరమీదకి రానుంది. నిజానికి గతేడాది ఏప్రిల్ నెలలో విడుదల కావాల్సిన ఆ సినిమా కోవిడ్ కారణంగా వాయిదాపడింది. ఈ సినిమాలో రన్వీర్ కపిల్ దేవ్ పాత్రలో నటించగా.. దీపిక కపిల్ దేవ్ భార్యగా కనిపించనుంది. ఇకపోతే దీపిక, రన్వీర్ చేతుల్లో ప్రస్తుతం చాలా సినిమాలే ఉన్నాయి. దీపిక శకున్ బాత్రతో ఓ సినిమా, సిద్ధార్థ్ ఆనంద్ తో ఫైటర్, అలాగే ప్రభాస్ తో ఓ సినిమా కలిగిఉంది. అలాగే రన్వీర్.. జయేష్ భాయ్ జోర్దార్, సర్కస్ సినిమాలు చేస్తున్నాడు.