ప్ర‌భాస్ కి ఆవిడ‌.. చ‌ర‌ణ్ కి ఈవిడ కావాలా?

బాలీవుడ్ క‌థానాయిక‌ల‌కు టాలీవుడ్ లో ఉండే గిరాకీ వేరు. ముంబై బెంగ‌ళూరు వంటి టాప్ క్లాస్ న‌గ‌రాల ర్యాంపు నుంచి వ‌చ్చే మోడ‌ల్స్ కి తొలి ప్రాధాన్య‌త ఉంటుంది. ఆ కోవ‌లో ఇప్ప‌టికే టాలీవుడ్ లో ఎంద‌రో ప్ర‌వేశించి.. అందులో కొంద‌రు అగ్ర క‌థానాయిక‌లు అయిన వాళ్లు ఉన్నారు.

ప్ర‌స్తుతం ప్ర‌భాస్ .. రామ్ చ‌ర‌ణ్ త‌దుప‌రి చిత్రాల‌కు క‌థానాయిక‌ల్ని ముంబై భామ‌ల్నే ఎంపిక చేసుకున్నారు. ఈ సంవత్సరం ప్రారంభంలో ప్రభాస్ 21 ప్రకటించినప్పటి నుండి క‌థానాయిక కోసం వెతుకుతూనే ఉన్నారు నాగ్ అశ్విన్- ద‌త్ బృందం. నిన్న మొన్న‌టివ‌ర‌కూ ప‌లువురు బాలీవుడ్ నటీమణుల పేర్లు ప్రభాస్ 21 కి ప‌రిశీల‌న‌లో ఉన్నాయి. సాహోలో శ్ర‌ద్ధా క‌పూర్ కి.. రాధేశ్యామ్ లో పూజా హెగ్డేకి ఛాన్సిచ్చాడు డార్లింగ్. ఆ ఇద్ద‌రూ ముంబై భామ‌లే. ఈసారీ ఆప్ష‌న్ బాలీవుడ్ క‌థానాయిక‌కే. `ప‌ద్మావ‌త్` దీపిక ప‌దుకొనేకి అవ‌కాశం ఇవ్వాల‌ని ప్ర‌భాస్ భావించార‌‌ట‌. అంతేకాదు దీపిక అయితేనే త‌న‌కు స‌రిజోడు అని ప‌ట్టుప‌ట్టి కూచున్నాడ‌ని గుస‌గుస‌లు వినిపిస్తున్నాయి. అందుకే నాగ్ అశ్విన్ త‌న‌ని ఫైన‌ల్ చేశార‌ని తెలుస్తోంది.

అయితే దీపం ఉండ‌గానే చ‌క్క‌బెట్టుకోవాల‌న్న ప్రాతిప‌దిక‌న దీపిక ప‌దుకొనే ఈ చిత్రానికి సంత‌కం చేయాలంటే త‌న‌కు భారీ పారితోషికం ముట్ట‌జెప్పాల్సిందేన‌ని ప‌ట్టుబట్టింద‌ట‌. అందుకు మేక‌ర్స్ ఓకే చెప్ప‌‌డంతో దీపిక ఇప్పటికే డీల్ పై సంత‌కం చేసింద‌ట‌. నేటి ఉద‌యం 11 గంట‌ల‌కు ప్ర‌భాస్ 21 కి సంబంధించిన త‌దుప‌రి అప్ డేట్ ని ప్ర‌క‌టించేందుకు చిత్ర‌బృందం సిద్ధ‌మ‌వుతోంది. ఈ వేదిక‌పై దీపికను క‌థానాయిక‌గా ప్ర‌క‌టిస్తారేమో చూడాలి.

మ‌రోవైపు కొర‌టాల `ఆచార్య` కోసం నాయిక‌ల్ని ఎంపిక చేశార‌ని ప్ర‌చార‌మ‌వుతోంది. ఇందులో చిరు స‌ర‌స‌న కాజ‌ల్ ని ఫైన‌ల్ చేయ‌గా.. రామ్ చ‌ర‌ణ్ స‌ర‌స‌న మ‌రో ముంబై భామ కియ‌రా అద్వాణీని ఎంపిక చేశార‌ని తెలుస్తోంది. ప్ర‌భాస్ త‌ర‌హాలోనే చ‌ర‌ణ్ కూడా ముంబై భామ‌కే ప్రాధాన్య‌త‌నివ్వ‌డంపై ఆస‌క్తిక‌ర చ‌ర్చ సాగుతోంది.