స్మైలీ పంచ్: ర‌ండి.. కారులో వ‌చ్చి కూర్చోండి

ప్ర‌ముఖుల‌కు ఫోటోగ్రాఫ‌ర్ల‌కు మ‌ధ్య ర‌చ్చ ఎప్పుడూ ఉండేదే. సెల‌బ్రిటీలు.. సినీ స్టార్లు క‌నిపించినంత‌నే ఫోటోగ్రాఫ‌ర్ల కెమేరాలు ఎంత‌గా ప‌ని చేస్తాయో ప్ర‌త్యేకంగా చెప్పాల్సిన అవ‌స‌ర‌మే లేదు. వెంటాడుతున్న‌ట్లుగా వారి తీరు ఉంటుంది. ఎవ‌రికి చిక్క‌ని త‌న‌కే చిక్కాల‌న్న ప్ర‌య‌త్నం ఒక‌టైతే.. మితిమీరిన అత్యుత్సాహం మ‌రొక‌టి. డిజిట‌ల్ ఫార్మాట్ వ‌చ్చాక‌.. అదే ప‌నిగా క్లిక్ చేయ‌టం.. ఏదో ఒక ఫ్రేమ్ ఊహించ‌ని రీతిలో క్లిక్ చేయ‌గ‌లిగితే ఆ ఫోటోకు ఉండే డిమాండ్ అంతా ఇంతా కాదు.

ఫోటోగ్రాఫ‌ర్ల కార‌ణంగా హీరో.. హీరోయిన్లు అప్పుడ‌ప్పుడు ఇబ్బందుల‌కు గురి అవుతుంటారు. చాలా సంద‌ర్భాల్లో వీరిద్ద‌రి మ‌ధ్య త‌గ‌దాలు జ‌రుగుతుంటాయి. తాజాగా బాలీవుడ్ న‌టి దీపికా ప‌దుకునేకు ఇలాంటి అనుభ‌వ‌మే ఎదురైంది. అయితే.. ఆమె త‌న బ్యాలెన్స్ మిస్ కాకుండా ప‌రిస్థితిని భ‌లేగా డీల్ చేశార‌ని చెప్పాలి.

ముంబ‌యి ఎయిర్ పోర్ట్ నుంచి త‌న ఇంటికి వెళ్లే క్ర‌మంలో కారు వ‌ద్ద‌కు వ‌చ్చారు. దీపికా లాంటి స్టార్ హీరోయిన్ బ‌య‌ట క‌నిపిస్తే ఫోటోగ్రాఫ‌ర్లు ఊరుకుంటారా? కెమేరాల‌కు ప‌ని చెప్పేశారు. మోతాదు మించిన రీతిలో ఆమెకు ద‌గ్గ‌ర‌గా వ‌చ్చేసిన తీరుతో చిరాకు పుట్టించేశారు. అయిన‌ప్ప‌టికీ త‌న ముఖంలో చిరాకును ప్ర‌ద‌ర్శించ‌కుండా న‌వ్వుతూ ఎట‌కారం ఆడేశారు.

రండి.. కారులో కూర్చోండి అంటూ ఒక మాట అనేశారు. ఆమెను ఫోటోలు తీస్తున్న వారిలో ముంబ‌యికి చెందిన ప్ర‌ముఖ సెల‌బ్రిటీ ఫోటోగ్రాఫ‌ర్ విరాల్ భ‌యానీ కూడా ఉన్నారు. దీపిక రియాక్ట్ అయిన తీరును ఆయ‌న వీడియో తీశారు. త‌న సోష‌ల్ అకౌంట్ ఇన్ స్టాగ్రామ్ లో పోస్ట్ చేశారు. అదిప్పుడు వైర‌ల్ గా మారింది. ఒక‌ప‌క్క ఇబ్బంది ప‌డుతున్నా అలాంటిదేమీ బ‌య‌ట‌కు రాకుండా న‌వ్వుతూ వేసిన పంచ్ దీపిక తీరు ఇప్పుడు అంద‌రి దృష్టిని ఆక‌ర్షిస్తోంది.


వీడియో కోసం క్లిక్ చేయండి